Rusiya Federasiyasında yaşayan azərbaycanlı oxucularımızdan biri tərəfindən “Hürriyyət” qəzetinin redaksiyasının müraciət daxil olub. Şikayətçi Azərbaycan bayrağına qarşı hörmətsizlik olunmasına etiraz edir. Məlumat verir ki, Rusiyanın Çelyabinsk (“Челябинская”) bazarında Azərbaycan bayrağının rəngləri əks olunan qutular istifadə olunduqdan sonra zibillik sahəsinə atılır ki, bu da bayrağımıza qarşı aşkar sayğısızlıqdır:

“Belə bir sual ortaya çıxır: gömrük və digər qurumlar hara baxırlar? Vətənpərvərlik vətənini, dövlətini, xalqını, millətini sevməkdir! Onun inkişafına, rifahına çalışmaq, töhfələr verməkdir!

Üçrəngli bayrağımız milli birliyimizin təcəssümü, şəhid ruhlarının daşıyıcısıdır. Bayraq dövlətin əsas atributlarından biridir. O, müstəqiliyin və mövcudluğun rəmzidir. Hər bir ölkə öz bayrağı ilə dünyada tanınır.

Təəssüf ki, bəzi hallarda ya bilərəkdən, ya da bilməyərəkdən bayrağımıza qarşı hörmətsizlik olunur. Bu rənglərdən asanlıqla hər kəs öz mənfəəti üçün istifadə etməməlidir. Biz öz bayrağımıza, onun rənginə belə dəyər veririksə, onda başqa millətdən nə gözləyək?

Ən çətin günlərdə qoruduğumuz, uğrunda şəhidlər verdiyimiz bayrağımızın rəngləri indi hansısa ölkənin zibil sahəsinə atılır. Azərbaycanlı olan hər bir şəxs bu hadisəyə ciddi yanaşmalı və səhvini mütləq şəkildə düzəltməlidir.

Bir əsrdən çox yaşı olan bayrağımız tarixin bir çox hadisələrinə şahidlik etmiş, çətin sınaqlardan üzüağ çıxmışdır. Özümüz-özümüzə bu hərəkəti əsla etməməliyik”.

Məsələ ilə bağlı Bakı Dövlət Universitenin (BDU) Tarix kafedrasının müəllimi, politoloq Teymur Qasımlı ilə həmsöhbət olduq. O, bu kimi halların yolverilməz olduğunu bildirdi:

“Hər bir dövlətin öz atributları, dövlət simvolları çox önəmlidir. Çünki bu, dövlətin olması üçün vacib atributlardan və vacib məqamlardan biridir. Azərbaycan Respublikasının 3 rəngli bayrağı isə, mənə görə, dünyanın ən gözəl və ən mənalı bayraqlarından biridir. Azərbaycan Respublikasının bayrağının yaradıcısı, fikir babası Əlibəy Hüseynzadədir. Bayrağımızın siyasi olaraq yaradıcı isə Məhəmməd Əmin Rəsulzadədir. O bayrağın yaşaması, yaranması və cumhuriyətimizin işğalından sonrada bayrağın yaşaması və dalğalanması üçün də Məhəmməd Əmin Rəsulzadə müstəsna əhəmiyyətə, rola malik dövlət xadimimiz olub. Və Azərbaycanın qurtuluş ideoloqu, istiqlal çarçısı olub.

1991-ci ildə Azərbaycan bayrağı ikinci dəfə yenidən müstəqil Azərbaycanda dalğalandı. Əlbəttə, müstəqil dövlətimizdə belə hadisələrin baş verməsi yaxşı hal deyil. Bu, Azərbaycan Respublikasının vətəndaşı olaraq, şəxsən məni narahat edir, incidir. Mənim şəxsi düşüncəmə görə, belə hadisələrin baş verməsi insanların milli mənsubiyyətinə, dövlətə, bayrağa, millətə olan biganəliyindən irəli gəlir. Ona görə də, bu hadisələrin baş verməməsi üçün vətəndaşlarımız ilk növbədə gərək milli vətənpərvər, milli ruhlu olsun.

Bird aha deyirəm, sizin qaldırdığınız məsələ heç də xoş hadisə deyil, bunu hər bir Azərbaycan Respublikasının vətəndaşı qınamalı və bu kimi hallara qarşı ictimai qınaq ortaya qoyulmalıdır. Bu halın olmaması üçün isə insanın içində millət, vətən sevgisi, vicdan olmalıdır.

Azərbaycan Respublikasının dövlət atributlarının, dövlət rəmzlərinin qorunması üçün qanun var. Həmin qanuna əsasən, mütləq bu hadisəni törədənlər cəzalandırılmalıdır.

Əlbəttə, müəyyən bəlirli çərçivədə Azərbaycan Respublikasının dövlət maraqlarını təcəssüm etdirən, dövlət sifarişi ilə istehsal olunan bayraq şəkilləri, poçt markaları və s. hazırlana bilər. Amma, ümumi olaraq, mən bunun tərəfdarı deyiləm. İnsanın gərək millət, vətən sevgisi olsun. Ən önəmlisi də Azərbaycan milliyətçisi olsun, bayrağını, dövlət rəmzlərini, millətini, torpağını sevsin. İnsanın içində bir milli vicdan olmalıdır.

Ona görə də dövlət rəmzləri ilə bağlı olan məsələlər qanun çərçivəsində həll olunmalıdır, Azərbaycan Respublikasının Konstitusiyasına, Cinayət Məcəlləsinə uyğun tədbirlər görülməlidir. Bütün bunlardan əlavə, vətəndaşların özündə də məsuliyyət olmalıdır”.