Milli Məclisin plenar iclasının aprel ayının 12-dən 9-a təxirə salınmasına səbəb kimi Milli Məclis sədrinin birinci müavini Ziyafət Əsgərovun qızının toy günü ilə üst-üstə düşməsi haqqında Demokrat.az saytı xəbər yayıb.
Məsələ ilə bağlı Milli Məclisin mətbuat xidmətinin rəhbəri Akif Təvəkküloğlu Yeniavaz.com-a açıqlamasında bildirdi ki, bu tamamilə yalan söhbətdir, milli məclisin plenar iclasının təxirə salınmasından söhbət gedə bilməz:
“Tamamilə boş söhbətdir. Mən birinci dəfədir ki, eşidirəm. İclasın 12-də keçiriləcəyi informasiyasını kim yayıb axı? Orada da deyilib ki, iclas ayın 9-u keçiriləcək. Nə vaxt 12-nə təyin olunmuşdu ki, doqquzuna da təxirə salınsın. Bundan söhbət gedə bilməz. Yalan məlumatdı, düz informasiya deyil”.
Qeyd edək ki, Demokrat.az saytının yaydığı məlumata görə, aprel ayında Bakıda yerləşən dəbdəbəli "Böyük Saray" şadlıq evində Milli Məclisin 2 deputatı övladına toy edəcək. Aprelin 5-də sözügedən şadlıq sarayında Milli Məclisin deputatı İqbal Məmmədovun oğlunun toy mərasimi olacaq. Aprelin 12-də isə "Böyük Saray" şadlıq evində Milli Məclis sədrinin Birinci müavini Ziyafət Əsgərovun qızının da toy mərasimi keçiriləcək.
Saytın yazdığına görə, Milli Məclisin bu gün keçirilən plenar iclası zamanı Birinci vitse-spiker Ziyafət Əsgərov elan edib ki, Parlamentin növbəti iclası aprelin 9-da keçiriləcək. Milli Məclisin növbəti plenar iclasının aprelin 12-də keçirilməsi nəzərdə tutulurdu. İclas Ziyafət Əsgərovun qızının toy gününə təsadüf etdiyi üçün Milli Məclisin növbəti plenar iclasının vaxtının ertələndiyi ehtimal edilir.


Paylaş: