Şəkinin Daşüz kənd orta məktəbinin direktoru Anjilixa Əmirseyidovanın "Gəl danış" layihəsi çərçivəsində şagirdlərə paylanan kitabları yandırdığı iddia edilir. Bu barədə layihə rəhbəri Ümman Səfərov sosial şəbəkə hesabında məlumat paylaşıb.
“Yeni Sabah”a açıqlama verən Ü. Səfərov 2018-ci ildən bu təşəbbüslə çıxış etdiklərini, ölkənin müxtəlif regionlarına yollanaraq imkansız ailələrin uşaqlarına bədii kitablar, məktəb ləvazimatları, ərzaq və s. payladıqlarını bildirib:
“Daşüz kənd orta məktəbinə paylanılan kitabların heç bir siyasi və ya dini məzmun daşımırdı. Uşaq ədəbiyyatı idi. Apardıq, hamı istəyirdi, heç bir problem olmadı, kitabları uşaqlara, böyüklərə payladıq, söhbət etdik. Qayıtdıq. Sonra da xəbər gəldi ki, kitablar yandırılıb”.
Əksər orta məktəblərin bu təşəbbüsə dəstək verdiklərini deyən layihə rəhbəri bu hadisəyə görə təəssüf hissi keçirdiklərini deyib. O bildirib ki, şagirdlərimizin maarifləndirilməsi üçün apardıqları bu xeyriyyə kampaniyasına belə reaksiya verilməsi utancvericidir. 
Məsələ ilə bağlı “Qaynarinfo”ya açıqlama verən Şəki Şəhər Təhsil Şöbəsinin müdiri Südabə İsmayılova isə yazılanların həqiqətə uyğun olmadığını və bu barədə araşdırma apardıqlarını bildirib:

"Xeyr, məsələ heç də bu cür olmayıb. Bunu yazan adam da təkzib verməlidir. Məktəbin direktoru mənə məlumat verib ki, srağagün uşaqlar dərsdən gedərkən onlara qara rəngli bir avtomobil yaxınlaşıb və bir neçə şagirdə kitab veriblər. İstər MMC, istər hansısa QHT olsun, kitab verirsə, buna görə Təhsil Nazirliyindən icazələri olmalıdır. Biz maarifləndirmə tədbiri üçün heç nə demirik. Yalnız bu işlər Təhsil Nazirliyinin müvafiq icazəsi altında aparılmalıdır. İcazə olanda, biz bütün lazımi təşkilati köməkliyi göstəririk. Cəmi 6-7 uşaq kitab alıb, qalanları almayıb. Həmin kitablar da şagirdlərin evindədir. Biz bunların hansı kitablar olduğunu müəyyənləşdirməyə çalışırıq. 
Lakin məzmunundan asılı olmayaraq, kitabın yandırılması vandalizmdir. Onu yandırmaq olmaz. Əgər kitabın məzmunu bugünkü həyatımıza, əqidəmizə ziddirsə, yaxud xaricdən hansısa məqsədlər üçün gəlibsə, lazımı orqanlara təhvil verilməlidir ki, onlar iş aparsın. 
Məktəb direktorunun dərslikləri pulla satması məsələsinə gəlincə, deyə bilərəm ki, məktəbdə 100 faizlik dərslik təminatı var. Ölkədə bütün dərsliklərin şagirdlərə pulsuz paylandığını hamı bilir. Pulla kitab satılmasından söhbət gedə bilməz".
  

 


Paylaş: