Son illər Azərbaycanda uşaqların “zerkalnı” tarixdə doğulması üçün anaların keysəriyyə əməliyyatına başa vurması populyar hal alıb. Övladının xüsusi tarixdə dünyaya gəlməsini istəyən valideynlər tibbi müdaxilə yolu ilə doğuşu 1-2 gün tezləşdirir, ya da yubadırlar. Məsələn, ötən il xeyli sayda valideyn körpələrini 19.12.2019 tarixində dünyaya gətirmək üçün doğuş tarixini dəyişməyə çalışıb.
Sosial şəbəkələrdə gedən müzakirələrdə bildirilir ki, həmin günlər xəstəxanalarda digər xəstələri yatırmağa yer tapılmır. 2020-ci ildə də belə “zerkalnı” tarixlər (02.02.2020 və ya 20.02.2020) mövcuddur.

Bəs doğuşu tibbi müdaxilə yolu ilə tezləşdirmək və ya yubatmaq ananın və dünyaya gələcək körpənin sağlamlığına necə təsir edir?

Mama-ginekoloq Gülnar Ağayeva “Yenisabah.az”a bu təhlükəli tendensiyadan danışıb.

O bildirib ki, bu qərarı verən ana və onunla razılaşan həkim məsuliyyət daşıyır:

“Bu heç bir millətdə yoxdur, təkcə bizim millətdə olan bir fikirdir. Doğuşun vaxtıdırsa, sən doğuşa müdaxilə edə bilməzsən. Əgər keysəriyyə əməliyyatına göstəriş olarsa, o zaman keysəriyyə əməliyyatı baş tuta bilər. Düzdür, doğuşu 2-3 gün gec və ya tez etmək olar. Amma məhz uşaq bu tarixdə doğulsun deyə, normal doğuşa imkan ola-ola keysəriyyə əməliyyatı etdirmək istəyənlərin psixologiyasında problem var. Burda həm ana, həm də həkim məsuliyyət daşıyır. Belə doğuşun müxtəlif fəsadları da ola bilər. Bu əməliyyata razılıq verən həkim də normal deyil".

Həkimin sözlərinə görə, keysəriyyə əməliyyatına yalnız göstəriş olduqda icazə vermək olar:

"İndi bir çox xəstəxanada göstəriş olmadan keysəriyyə əməliyyatına icazə vermirlər. Göstərişlərə isə gözdə zəiflik, uşaqlıq yolunda çapıq və s. aid edə bilərik.

Belə əməliyyatın daha çox anaya fəsadları olur. Məsələn uşaqlığın yığılma qabiliyyətinin pozulması, embaliya, qanaxma və s. ola bilər”.


Paylaş: