Fevralın 9-da keçiriləcək növbədənkənar parlament seçkilərinin təbliğat və təşviqat mərhələsi başlayandan bəzi namizədlər sosial şəbəkələrdə gülüş hədəfinə çevrilib.
Belə namizədlərdən biri də 32 saylı Suraxanı üçüncü seçki dairəsindən namizəd Rəcəbov Vəlican Etibar oğludur. Vəlican Rəcəbovun hədəfə gəlməsinin səbəbi isə təbliğat plakatında “Aptek Məzahirin nəvəsi” qeydidir.

Apardığımız araşdırmalar zamanı bəlli olub ki, Vəlican Rəcəbov Buzovna qəsəbəsində yaşayır. Babası əczaçı olub. Ötən ilin oktyabrında Vəlican Rəcəbov Buzovnada döyülməsi ilə medianın gündəminə gəlib.

Həmin vaxt yayılan məlumatlarda bildirilirdi ki, tanışları ilə mübahisə edən Vəlican Rəcəbov döyülərək ağır xəsarət alıb. O, təcili tibbi yardım briqadasının köməkliyi ilə xəstəxanaya gətirilib. Vəlican Rəcəbova burnun sınığı və döş qəfəsinin əziyi diaqnozu qoyulub. Bu hadisənin hansı sonluqla bitdiyi barədə isə bilgi yoxdur.


Paylaş: