Redaksiyamıza Dövlət Yol Polisi əməkdaşının müxtəlif yerlərdə ona ayrılmış ərazidən kənarda xidmət aparması və həmin yerdə sürücülərə cərimə tətbiq etməsi ilə bağlı şikayət daxil olub. Sürücülər bildirib ki, əgər hər yol polisi əməkdaşı üçün ərazi müəyyən edilirsə onlar nə üçün xidməti ərazidən kənarda fəaliyyət göstərirlər? Mövzuya aydınlıq gətirməsi üçün Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyevlə əlaqə saxladıq.
Kamran Əliyev açıqlamasında bildirdi ki, vətəndaş yol polisi əməkdaşının harada xidmət aparıb-aparmayacağını bilə bilməz. Bu, xidmətlə bağlı prosesdir:
"Yol polisinin hansı ərazidə xidmət edəcəyini ona nəzarət edən orqan müəyyən edir. Vətəndaşa gəldikdə isə hər hansı narazılığı varsa, qayda pozuntusuna yol veribsə, inspektor onu sənədləşiribsə sürücü şikayət edə bilər. Burada qeyd etmək istəyirəm ki, protokolun yazıldığı yer yol polisinin xidməti ərazisinin olub-olmaması sürücünü məsuliyyətdən azad etməz. Heç bir yol polisi özbaşına başqa bir ərazidə xidmət apara bilməz. Yol patrul əməkdaşları səhər-səhər təlimatlandırılırlar və uyğun ərazilərə göndərilirlər".
Yeri gəlmişkən qeyd edək ki, sürücülərin ən çox şikayət etdiyi mövzulardan biri də xüsusilə gecə vaxtı yol patrul avtomobillərinin sayrışan işıqdan istifadə etmədən ərazidə xidmət aparmalarıdır. Kamran Əliyev bu mövzuya da aydınlıq gətirdi. O, Yeniavaz.com-a bildirdi ki, yol patrul əməkdaşları bəzi hallarda qanunun tələblərindən kənara çıxa bilərlər:
"Ümumiyyətlə dayanma-durma qaydalarının pozulmasına pol patrul əməkdaşlarına da icazə verilmir. Ancaq xidməti zərurətlə bağlı xüsusi hallarda qanunun tələblərindən kənara çıxa bilərlər. Normal hallarda isə yol patrul əməkdaşı xidmət apardığı yerdə sayrışan işıqlarını yandıraraq dayanmalıdırlar".(Yeniavaz.com-a)


Paylaş: