Bu gün müasir Azərbaycan tarixinin ən faciəvi günlərindən biridir. 11 il öncə bu gün Azərbaycan Dövlət Neft Akademiyasının tədris binasına silahlı hücum olub, 12 nəfər (çoxu tələbə) məsum insan qətlə yetirilib.Üstündən 11 il keçməsinə baxmayaraq, geniş ictimaiyyət hələ də bu qanlı terror aktıyla bağlı bir sıra cavabsız suallar qarşısındadır.
Bu, hadisə niyə baş verdi? Qətliamın motivi nəydi? Terrorçu Fərda Qədriov bir psixopat-manyak idi, yoxsa xüsusi təlim görmüş atıcı? (Əslində bu sualın cavabını terrorçu özü qurbanların başını sərrast nişan almaqla qismən vermişdi). Hadisənin arxasında hansısa dövlətin kəşfiyyat strukturu dururdumu? Terrorçu tək olmuşdu, yoxsa “qara işi” görəndən sonra onu da zərərsizləşdirən biri olub?
Suallar çoxdur. Bunların bəzilərinin yarımçıq və rəsmi qəbul edilmiş cavabları var, amma illər keçdikcə bunlar adamlara inandırıcı görünmür.

Ən ümdəsi isə budur: bir xarici ölkədə (Gürcüstanda) doğulub-böyüyən, başqa bir ölkədə (Rusiyada) yaşayan terrorçu nəyə görə məşum aktını üçüncü ölkədə həyata keçirib? Axı bu ölkədə onun xətrinə dəyən, həyatını qaraldan, kareyerasına mane olan, haqsızlıqlara məruz qoyan heç kim yox idi.
Əgər adam ətrafındakı insanların əlindən zülm-zillət çəkibsə, onlara qarşı nifrət ovqatına köklənibsə belə, bu halda yenə doğulub-böyüdüyü və ya faktiki olaraq yaşadığı ölkənin insanlarına nifrət etməli, qisasını onlardan almalıydı. Bəs o, nəyə görə 500 kilometr yolu basa-basa bizim ölkənin paytaxtına gəldi?
Fərda Qədriov zombiləşmiş və ya zombiləşdirilmiş psixopat idisə və hökmən azərbaycanlı gəncləri öldürməyə proqramlaşdırılmışdısa, bunu “Sınıq körpü” sərhəd-keçid məntəqəsini keçəndən bir az sonra, elə Qazax şəhərinin bazarında da edə, çoxlu gənc qurban tapa bilərdi.
Yeri gəlmişkən, o, mütləq azərbaycanlı tələbələri güllələməyi qarşısına məqsəd qoymuşdusa, yolunun üstündəki Gəncədəki 3 universitetdən birini seçib ora gedə bilərdi. Amma o məhz Bakıya və məhz ADNA-ya gəldi.
Bu baxımdan terrorçunun terakt meydanı olaraq seçdiyi ali təhsil ocağı maraq doğurur. O dönəmdə ölkəmizdə daha məşhur, adları öndə gələn universitetlər vardı: BDU, Tibb Universiteti, İqtisad Universiteti, Qafqaz Universiteti və s. Amma terrorçunun Neft Akadamiyasını seçməsi də səbəbsiz deyildi.
Bu, məhz o dönəm idi ki, hər gün dövlətimizin büdcəsinə yüz milyonlarla dollar həcmində nef gəlirləri daxil olurdu. Ölkə 100 il əvvəl olduğundan da daha iri miqyasda “neft bumu” yaşayırdı. Neftə görə Azərbaycanın adı dünyayla bir olmuşdu. Tikinti-quruculuq işləri böyük vüsət götürmüşdü. Azərbaycan manatı dünyanın 3 ən bahalı valyutasından birinə çevrilmişdi. Bir sıra qonşu və uzaq dövlətlərdə bu tərəqqinin qısqanclıq doğurduğu gün kimi aydın idi. Hər halda həmin ölkələrin mediasında ölkəmizə yönəlik mənfi yüklü materiallar çoxalmışdı.
Ona görə də Azərbaycanın məhz ən həssas yerindən – uğurlarının əsas qaynağı olan neftin və gəncliyin üzərindən vurulması sui-qəsd nəzəriyyəsi tərəfdarları ilə yanaşı, ayıq, soyuq düşünməyi üstün tutan analitiklərin də nəzərini şimala yönəltmişdi.
Təəssüf ki, bu xətti sona qədər inkişaf etdirmək, əsl həqiqəti ortaya çıxarmaq mümkün olmadı. İstintaq dalana dirəndi. Hadisənin törədilməsində 3-cü, 4-cü dərəcəli rol oynayan adamlar həbs və məhkum edildilər. Terrorçu ölmüşdü deyə, mümkün sifarişçilərin, təşkilatçıların kimliyi də qaranlıq qaldı.
Ortada qanlı bir sui-qəsd olması isə fakt idi. Motivi tam bəlli olmayan bir-sui qəsd, bir qətliam.

Həmin o məşum hadisə baş verməsəydi, o gənclər bu gün aramızda olardılar. İndi yəqin ki, hamısı ailə qurmuşdular, iş-güc yiyəsiydilər. Fəqət hansısa cani təfəkkürün, psixopat əməlinin qurbanı oldular.
Bu cür hadisələr gərək unudulmasın, vaxtaşırı xatırlansın ki, müasir gənclər nail olduqları azadlığın, inkişafın qədrini bilsinlər, anlasınlar ki, heç də hər şey asan əldə olunmayıb, onların bu günlərə çıxması üçün nə qədər həmyaşıdları həyatlarını itiriblər.
P.S. El arasında 4-cü günə “adna günü” deyirlər. 11 il öncə də aprelin 30-u adna günüydü.(musavat.com)
***
Bu gün Azərbaycan Dövlət Neft Akademiyasında (ADNA) törədilən terror aktının növbəti ildönümüdür."Report" xəbər verir ki, terror hadisəsindən 11 il ötür.
Kütləvi qətllə nəticələnən faciə 2009-cu il aprelin 30-da Azərbaycan Dövlət Neft Akademiyasının (ADNA) Bakı şəhəri, Dilarə Əliyeva küçəsi, 227 saylı ünvanda yerləşən ikinci korpusunda baş verib. Ali məktəbin binasına daxil olan Gürcüstan vətəndaşı, 1980-ci il təvəllüdlü Qədirov Fərda Əsəd oğlu inzibati binanın birinci mərtəbəsindən altıncı mərtəbəsinədək qarşısına çıxan hər kəsə “Makarov” tipli tapançadan atəş açıb, nəticədə 12 nəfər ölüb, 13 nəfər isə yaralanıb. Hadisəni törədən şəxs binanın sonuncu mərtəbəsində əlindəki silahla özünü vuraraq intihar edib.

Baş vermiş hadisə ilə bağlı Respublika Baş Prokurorluğu və Daxili İşlər Nazirliyinin əməkdaşlarından ibarət əməliyyat istintaq qrupu yaradılıb. Həyata keçirilən tədbirlər nəticəsində F.Qədirovla əlaqəli şəxslərin bir çoxu cinayət məsuliyyətinə cəlb olunub. Baş verən kütləvi qətlin sifarişçisinin erməni əsilli Gürcüstan vətəndaşı Mardun Qumaşyan olduğu müəyyənləşib. Cinayət işinin materiallarına görə, Neft Akademiyasında terror aktının törədilməsini sifariş verən Qumaşyan Mardun Qriqoryeviç 1951-ci il mart ayının 6-da Gürcüstanın Marneuli rayonunun Şulaver kəndində anadan olub. Mardun Qumaşyanın barəsində İnterpol xətti ilə beynəlxalq axtarış elan olunub. Fərda Qədirovun ölümü ilə əlaqədar cinayət işinin onun barəsində olan hissəsinə xitam verilib.
Ağır Cinayətlərə Dair İşlər üzrə Məhkəmənin 2010-cu il avqust 10-u tarixli hökmü ilə iş üzrə təqsirləndirilənlər - Nadir Əliyev, Cavidan Amirov, Nəcəf Süleymanov ömürlük, Ariz Qabulov isə 11 il müddətinə azadlıqdan məhrum edilib.
Qeyd edək ki, Azərbaycan Respublikasının Prezidentinin 3 sentyabr2015-ci il tarixli Sərəncamına əsasən Azərbaycan Dövlət Neft Akademiyası Azərbaycan Dövlət Neft və Sənaye Universiteti adlandırılıb.
"Report" terror aktı nəticəsində ölənlərin və yaralıların adlarını xatırladır:
Neft qaz istehsalı və emalı texnikası kafedrasının müdiri, professor Abdullayev Ramiz Xəlil oğlu, 1940-ci il təvəllüdlü
Nəzəri Mexanika fakültəsinin laboratoriya müdiri Əzizova Tamilla Zülfüqar qızı, 1951-ci il təvəllüdlü
Neft qaz istehsali və emali texnikası kafedrasının müəllimi, dosent Vahidov Məcnun Abdulvahid oğlu, 1946-ci il təvəllüdlü
Biotexniki və texniki cihazlar kafedrasının laborantı Məmmədova Şəfa Afət qızı, 1978-ci il təvəllüdlü
Tələbələr:
Məmmədov Taleh Tariyel oğlu, 1988-ci il təvəllüdlü
Bəndəliyev Yusif Telman oğlu, 1989-cu il təvəllüdlü
Bağırov Ayaz Cavanşir oğlu, 1988-ci il təvəllüdlü
Cabbarov Savalan Allahverdi oğlu, 1987-ci il təvəllüdlü
Abdullayev Emin İmaməli oğlu, 1989-cu il təvəllüdlü
Babaşov Ruslan Cəfər oğlu, 1990-ci il təvəllüdlü
Aslanov Ceyhun Sakit oğlu, 1988-ci il təvəllüdlü
və Akademiyaya süd məhsulları gətirən:
Qurbanova Ayna Abbasqulu qızı, 1957-ci il təvəllüdlü
Yaralananların siyahısı:
İsayev Kənan
Mustafa Məhəmməd
Rüstəmbəyov Faiq
Şirəliyev İlkin Azər oğlu (1989-cu il)
Mustafayev Elşən Elbəy oğlu (1989-cu il)
Axundov Rəhman
Cəmiyev Elvin Azər oğlu (1989-cu il)
Hüseyinli Zemfira
Daas Muavviyyə (Suriya)
Seyidəhməd Əmru.


Paylaş: