Məlum olduğu kimi, pandemiya ilə bağlı hökumətin aztəminatlı vətəndaşlar üçün nəzərdə tutduğu 190 manatlıq birdəfəlik yardımın paylanması zamanı ortaya çoxsaylı problemlər çıxıb. Bu problemlər əsasən rəsmi orqanlarda vətəndaşların qeydiyyatı, ailə vəziyyəti, sosial durumu, rəsmi iş yerləri, sahibkarlıq fəaliyyəti və s. ilə bağlı qeyri-dəqiq məlumatların olmasından qaynaqlanır.

“AzPolitika.info” vasitəsilə ölkə başçısına müraciət edən Nağiyev Oruc Sabir oğlu da rəsmi qurumların qeydiyyat sistemlərindəki problemlərin hədəfinə çevrilərək, birdəfəlik yardımdan məhrum edilən vətəndaşlardan biridir.

O.Nağıyev bildirir ki, həyat yoldaşı hələ 2004-cü ildə vəfat etdiyi halda, ona mərhum yoldaşının adına avtomobil olduğu bəhanə gətirilərək, birdəfəlik yardımdan imtina edilib: “Mən Nağıyev Oruc Sabir oğluna(Ş/v AZE 00092224 FİN 140FTF3) mesaj gəlib ki, birdəfəlik ödəmə mənə ödənilməyəcək- səbəb həyat yoldaşımın adına nəqliyyat vasitəsinin olmasıdır. Sizə bildirirəm ki mənim həyat yoldaşim 14.04.2004-cu ildə vəfat edib.”

Məktubunda ölkə başçısına və nazir Sahil Babayevə müraciət edən şikayətçi hüququnun bərpa olunmasını və birdəfəlik müavinətlə təmin edilməsini xahiş edir.


Paylaş: