“Dövlət büdcəsi yalnız Maliyyə Nazirliyinin büdcəsi deyil. Elə suallar var ki, biz onu digər qurumların rəhbərlərindən də soruşmaq istərdik. Xüsusilə bank sistemi ilə bağlı suallarım var idi”. 
Bunu deputat Vahid Əhmədov parlamentdə dövlət büdcəsinin icrası ilə bağlı layihənin müzakirəsində çıxış edərkən deyib. O qeyd edib ki, bank sisteminin monitar siyasətin qorunması istiqamətində əhəmiyyəti var: “Dövlət büdcəsinin icrasına daha dəqiq yanaşmalıyıq. Bir sıra hökumət üzvlərini çağırmalıyıq ki, suallarımıza cavab versin.
Hazırda Mərkəzi Bankın rəhbərliyi burada yoxdur. Düzdür, 2019-cu ildə uçot dərəcəsində enmələr baş verdi. Ancaq 2019- cu ildə bank sistemində ciddi irəliləyişə nail ola bilmədik. Problemlər hələ də qalmaqdadır. Yüksək faiz dərəcələri, istehlak kreditləri qalıb. Bu da real sektorunun inkişafına təsir edib.
Mərkəzi Bank 2020-ci ildə həm uçot dərəcəsi, həm də real sektorun inkişafını diqqətdə saxlamalıdır. Bu yaxınlarda 4 bank bağlandı. Bunların hamısının birlikdə əmanəti 700 milyon manatdan artıqdır. Burada söhbət ancaq əmanətlərdən gedir. Doğrudan da həmin banklarda vəsait varmı bu qədər əmanəti qaytarmağa? Yoxsa yenə dövlət büdcəsinə müraciət edəcəklərmi? Mən açığı bankların bağlanmasının tərəfdarı olmamışam. Bunların birləşdirilməsi prosesi olmalıydı. İnsanlar kifayət qədər iş yerlərini itiriblər”.
V. Əhmədov insanların içməli su, o cümlədən suvarma sistemləriylə bağlı məsələlərinin həlli üçün Maliyyə nazirinin ölkə başçısına məruzə etməsini istəyib.
Deputat, həmçinin ölkədə ixracın yox səviyyəsində olduğunu vurğulayıb: “Sadəcə neft və bir-iki kənd təsərrüfatlı məhsulu ixrac edirik. Qalan heç bir sahədə, xüsusilə də sənayedə ixrac yoxdur. Azərbaycanda iri sənaye müəssisələrinin yaradılmasına ehtiyac var”. (“Qafqazinfo”)


Paylaş: