“Bəzi işbazlar, yalançılar, dil pəhləvanları Ulu Öndərin ad günündə, anım günündə, Qurtuluş Bayramında və Ulu Öndərin adı ilə bağlı olan digər tədbirlərdə, həmçinin sosial şəbəkələrdə, televiziyalarda, mətbuatda utanmadan, qızarmadan əsassız çıxışlar edir, özlərini qəhrəman, cəngavər kimi göstərməyə çalışırlar”.
Bu sözləri Yenisabah.az-a hakim Yeni Azərbaycan Partiyasının (YAP) qurucularından olan, keçmiş icra başçısı Musa Musayev deyib. O daha sonra bildirib: “Mən bir sual ünvanlamaq istəyirəm: 1987-ci ildən 1993-cü ilin Qurtuluş Gününə qədər Heydər Əliyevin bədxahlarına – Qorbaçov, Vəzirov və Mütəllibova qarşı təkbaşına mübarizə aparan, akademik Cəlal Əliyevin sağlığında niyə öz “qəhərmanlıqlarından” danışmırdılar? Mən o dövrün əksər hadisələrinin şəxsən şahidi olmuşam, daima faktlarla, sübutlarla, arxiv sənədləri əsasında çıxışlar etmişəm. Ulu Öndərin Naxçıvandan Bakıya iki möhtəşəm səfəri olub: Birinci səfəri 1993-cü ilin fevralında, mərhum akademik Həsən Əlirza oğlu Əliyevin yas mərasimi ilə əlaqədar olub.İkinci səfəri isə Qurtuluş səfəridir. Tale elə gətirib ki, mən YAP-ın Nəsimi rayon təşkilatının sədri kimi Heydər Əliyev Bakıda olduğu müddətdə akademik Cəlal Əliyevin tapşırığı ilə mühafizəsini təşkil etmişəm. Bu işdə Lahuti Əliyevin xidmətləri var. Yəni, bu iş ikimizə həvalə edilib. Məhz bu səbəbdən hər iki səfərdə Ulu Öndəri qarşılayanlarla bir sırada olmuşam. Ulu Öndər Celal müəllimin evində qaldığı müddətdə biz blokun qabağında və maşınlarda növbə çəkmişik. Rəhmətlik akademik Həsən Əliyevin yasına gələndə və Qurtuluş səfərində Ulu Öndərin yanında daim bu şəxslər olub: Mərhum akademik Cəlal Əliyev, Bəylər Əyyubov, mərhum Rafael Allahverdiyev, Məhərrəm Talıbov, mərhum Lahuti Əliyev, soyadlarını xatırlamadığm Əmir, Amay Abdulla, Müşfiq, Sabir, Babək, Tahir, Rafik və Ramiz.
Ulu Öndər Gəncəyə gedəndə isə yanında Mahmud Məmmədquliyev olub. Bəylər Əyyubov, Əmir, Müşfiq, Amay Abdulla dediklərimin canlı şahidləridir”.
Musa Musayev sonda Heydər Əliyev barədə danışanları fakta və reallığa söykənməyən çıxışlar etməməyə çağırıb. “Özünüzü gülünc vəziyyətə salmayın, kiminsə xoşuna gəlməkdən ötrü məddahlıq etməyin. Axı bu tarixi yaşayan və yaşadan şahidlər var”, - deyə keçmiş icra başçısı vurğulayıb.


Paylaş: