İyulun 13-dən etibarən Rusiyanın paytaxtı Moskvada məcburi qoruyucu maska rekimi ləğv olunacaq. Rusiya mətbuatının yazdığına görə, bu barədə Moskva meri Sergey Sobyanin sosial şəbəkədə məlumat yayıb. O, qeyd edib ki, artıq iyulun 13-dən Moskva küçələrində maskasız gəzmək mümkün olacaq. Bununla yanaşı Moskva meri sosial məsafə tələbinin hələ də qüvvədə qaldığını vurğulayıb.

“13 iyul 2020-ci il tarixindən küçələrdə vətəndaşlara maskadan, repirator və digər qoruyucu vasitələrdən istifadə etmək tövsiyə olunur. Küçələrdə məcburi maska rejimi isə ləğv olunur”, - deyə o qeyd edib.

Məcburi maska rejiminin ləğvinin ardından isə Rusiya sentyabrın 1-dən məktəblərin açılmasına hazırlaşacaq. Belə ki, qərara əsasən məktəblər bundan əvvəl olduğu kimi öz vaxtında, yəni sentyabrın 1-də açılacaq.

Son bir neçə gündə Azərbaycanda koronavirusa yoluxanların sayın qismən də olsa stabilləşmə var. Bəs Rusiyadan sonra ölkəmizdə də məcburi maska rejimi ləğv oluna, dərslər öz vaxtında başlaya bilərmi?

Mövzu ilə bağlı təhsil eksperti Kamran Əsədov “Yeni Müsavat”a danışıb: “Məlum olduğu kimi, Azərbaycanda mart ayından etibarən tədris prosesi dayandırılıb və bu ölkə ərazisində koronavirusa yoluxmanın qarşısını almaq üçün atılan addımlardan biri idi. Bu gün ölkədə təhsil ətrafında birləşən əhalinin ümumi sayı ölkə üzrə ümumi vətəndaşların sayından dəfələrlə çoxdur. Ona görə də hesab edirəm ki, atılan addımlar uğurludur. Tədris prosesinin dayanması təbii ki, bütün təhsil alanlara çox ciddi mənfi təsir göstərdi. Artıq ali məktəblərə qəbul prosesi başlayıb. Lakin karantin rejimi olan yerlərdə imtahanların keçirilməməsi şagirdlər arasında çox cidd psixoloji problem və narahatlıq yaradıb”.

Təhsil eksperti qeyd edib ki, fərqli növbəlilik sistemi ilə Azərbaycanda da sentyabrda dərslərə başlamaq mümkündür: “Qeyd edim ki, yeni tədris ilinə bir çox ölkələr yeni qayda ilə başlayır. Hesab edirəm ki, Azərbaycanda da yeni tədris ili sentyabr ayında başlaya bilər. Burada dünya təcrübəsindən yaralanmaq lazımdır. Belə ki, Azrəbaycanda 4447 ümumi orta təhsil müəssisəsində 1,6 milyon şagirdin hamısı heç də hamısı eyni vaxtda dərsə başlamamalıdır. Burada dərslərin növbəliliyi prinsipinə müraciət etmək lazımdır. Növbə də 3 formada olmalıdır. I-III-V günlərdə orta ümumi təhsil məktəblərinin 1-5-7-9-cu siniflərində təhsil alan şagirdlər, digər II-IV-VI günlərdə isə digər şagirdlər dərsə gəlməlidirlər. Bu zaman məktəblərdə dərslərin başlanma vaxtı da müxtəlif olmalıdır. Yəni, dərslər əvvəlki kimi 5-6 saat deyil, maksimum 2-3 saata qədər olmalıdır. Beləliklə, 3 növbəli dərs prosesi tətbiq edilə bilər. Səhər saat 8:00-dən 11:00-a qədər bir qrup, məsələn, ibtidai sinif şagirdləri, daha sonra növbə ilə digər şagirdlərin maska taxıb, sosial məsafə gözləməklə dərslərə başlaması mümkündür. Artıq Rusiya, Türkiyə sentyabrda dərslərə başlayacağını elan edib. Gürcüstanda isə iyulun 7-dən peşə təhsil müəssisələri fəaliyyətə başlayıb. Azərbaycan da sentyabr ayında qeyd etdiyim formada dərslərə başlaya bilər”

İxtisasca həkim olan ADP sədri Sərdar Cəlaloğlu isə qeyd edib: “Əgər Azərbaycanda da yoluxma sayında stabilləşmə baş verərsə, əlbəttə ki, yumşaldıcı tədbirlər görüləcək. Əksinə, vəziyyət getdikcə ağırlaşarsa, hətta deyərdim ki, daha da sərt tədbirlərə getmək lazımdır. Yəni hər şey xalqın müdafiəsi üçündür”.

Sərdar Cəlaloğlu ölkəmizdə də yaxın vaxtlarda pandemiya ilə bağlı stabilləşmə ola biləcəyini dedi: “Dünyadakı prosesləri izləyirik. Şahidi oluruq ki, bir çox ölkələrdə, o cümlədən qonşu Türkiyədə vəziyyət stabilləşib. Buna uyğun demək olar ki, Azərbaycanda da yaxın günlərdə vəziyyət stabilləşəcək. Lakin onun da şahidi oluruq ki, ölkələrdə təkrar yoluxma sayı artır, yenidən sərt qaydalar tətbiq edilir və sairə. Bu baxımdan heç kəs dəqiq proqnoz verə bilmirik ki, bizi qarşıda hansı vəziyyət gözləyir. Əgər etinasızlıq, məsuliyyətsizlik baş verərsə, virusun nəinki ikinci, hətta üçüncü dalğası olacaq. Ona görə də əgər məsuliyyətli şəkildə özümüzü bu virusdan qorusaq, düzgün qaydada müalicəmizə davam etsək, vəziyyətin stabilləşməsinə baxmayaraq yenə də sosial məsafə saxlasaq, maska taxsaq təhlükə aradan qalxar”.

Sərdar Cəlaloğlu onu da qeyd etdi ki, uzun müddətli maska taxmağın özünün də orqanizmə ziyanı var: “Maskanı uzun müddət taxmaq ziyandır. Çalışmaq lazımdır ki, zəruri yerlərdə maska taxılsın. Daha sonra maskanı dərhal çıxartmaq lazımdır. Çünki maska tənəffüzü 30-40 faiz məhdudlaşdırır, oksigenlə təchizatı aşağı salır.


Paylaş: