Tanınmış iqtisadçı Məhəmməd Talıblı Azərbaycanın kənd təsərrüfatı sektorunda və ixracında pomidor istehsalının həcmini, ölkə iqtisadiyyatına faydasını təhlil edib. Xatırladaq ki, Rusiya bu il dekabrın 1-dən ölkəmizdən bu məhsulun idxalını məhdudlaşdırıb.
Məhəmməd Talıblı bildirib ki, Azərbaycanın qeyri-neft ixracında 1-ci yerdə pomidor ixracı durur və bu tendensiya 3 ildir davam edir. “Demək ki, bu məhsulun ölkəmizin qeyri-neft ixracı üçün önəmi böyükdür”, - deyə ekspert qeyd edib.
M.Talıblı Dövlət Gömrük Komitəsinin məlumatlarını təqdim edərək bildirib ki, 2019-cu il ərzində ölkəmizin qeyri-neft ixracı 1,96 milyard ABŞ dolları təşkil edib. Bunun da 690,6 milyon dolları Rusiyaya, Türkiyəyə 401,8 milyon və digər ölkələrin payına düşüb. Demək, qeyri-neft ixracatımızda birinci yerdə Rusiya gəlir.

Onun sözlərinə görə, 2019-cu il ərzində ixrac edilən qeyri-neft sektoruna aid malların siyahısına pomidor (189,3 milyon ABŞ dolları) liderlik edib: “Demək Azərbaycanda pomidor ixracı qeyri-neft ixracımızın 10 faizini təşkil edir. 2020-ci ilin 10 ayında isə bu rəqəm 12 faiz təşkil edib. Bu mənada pomidor ixrac üçün önəmli məhsul hesab olunur”.
M.Talıblı qeyd edir ki, 2020-ci ilin 10 ayı ərzində isə Azərbaycandan 12,2 milyard ABŞ dolları, o cümlədən qeyri-neft sektoru üzrə 1,4 milyard ABŞ dolları dəyərində ixrac reallaşdırılıb: “2020-ci ilin 9 ayı ərzində isə Azərbaycanın pomidor ixracından 167,8 milyon dollar gəlir daxil olub. Son 3 ildə birmənalı olaraq qeyri-neft ixracında pomidorun dominant rolu dəyişməyib. Pomidor ixracımızın isə demək olar ki, hamısı (99%), almanın isə 90%-dən çoxu Rusiya bazarına istiqamət alıb.
2020-ci ilin 9 ayı rəzində Azərbaycandan Rusiyaya 173 milyon dollarlıq pomidor, 21 milyon manatlıq isə alma ixrac edilib. Hər iki məhsul üzrə ölkəmiz 194 milyon dollarlıq ixrac gəliri əldə edib”.
Ekspert bildirir ki, bu rəqəm sadəcə neftimiz-qazımız var deyə, aşağı məbləğ sayılmamalıdır. 
“Belə ki, 2020-ci ilin yekunlaşmasına cəmi 1 ay qalıb. Cari ildə Şahdəniz yatağından qaz və kondensat satışından əldə edilən gəlir 276 milyon dollar olub. Bizim qaz gəlirlərimiz də bu mənada əvvəlki illərdəki neft gəlirləri olmayacaq”, - deyə iqtisadçı vurğulayıb.


Paylaş: