“Maral Nacaryanın azad edilməsi haqqında xəbəri Ermənistan tərəfi, xüsusən Paşinyanın ətrafındakılar özlərinin qələbəsi kimi təqdim etmək üçün ciddi-cəhdlə çalışdılar. Amma Nacaryanın həbsdən azad edilməsi məsələsinin Ermənistanın deyil, Livanın köməyi ilə reallaşması xəbəri ermənilərin təşəbbüsünün boşa çıxmasına səbəb olub”.
Bu fikirləri açıqlamasında politoloq Əlimusa İbrahimov deyib. O bildirib ki, Maral Nacaryan Livan vətəndaşıdır və digər livanlı ermənilər kimi, müharibədən əvvəl Şuşada yaşayıb, Azərbaycan Xüsusi Xidmət Orqanlarının əldə etdiyi məlumata əsasən hərbi əmliyyatlarda snayperçi kimi fəaliyyət göstərib: “Azərbaycana qarşı hərbi əmliyyatlarda iştirak etdiyinə görə Nacaryana qarşı cinayət işi qaldırılmışdı və o terrorçu kimi layiqli cəzasını alacaqdı. Ermənilər digər terrorçular kimi onun da azad edilməsini indiki halda özləri üçün prioritet məsələ hesab edirdilər. Eyni zamanda bu məsələni həll etməklə Paşinyan hökumətinin mövqeyini qüvvətləndirməyə çalışırdılar. Azərbaycan isə öz növbəsində Maral Nacaryan və onun kimi digər erməni silahlılarının hərbi əməliyyatlar bitəndən sonra antiterror fəaliyyət nəticəsində tutulduqlarını əsas gətirərək müvafiq qaydada mühakimə etmək niyyətində idi. Rusiya, Avropa və Amerikadan çoxsaylı müraciətlərə baxmayaraq onların terrorçu kimi həbsdə saxlanması üçün istintaq işləri davam etdirilirdi. Belə olan halda Maral Nacaryan nə üçün həbsdən azad edildi”?
Əlimusa İbrahimov sualın cavabını belə şərh edib: “Maral Nacaryan Ermənistan vətəndaşı deyildi və onun azad eilməsi üçün müraciət edənlər sıraya düzülmüşdü. Livan, Avropa Birliyi, Rusiya, Ərəb ölkələri və sairə. Bütün bu ölkələrin təzyiqlərinin qarşısında davam gətirmək, ya da Nacaryanı azad etməklə onların gözünü kölgəli etmək seçimi vardı. Biz ikinci yolu seçdik ki, bundan sonra digər terrorçuların azad olunması haqda xahiş etməsinlər.
Digər tərəfdən Maral Nacaryanın Türkiyə vasitəsi ilə birbaşa Livana göndərilməsi Ermənistanı azad etmə prosesindən kənarda saxladı və Ermənistanın bizim üçün artıq tərəf müqabili olmadığı əməldə sübuta yetirildi. Bəli Ermənistan artıq bizim üçün tərəf müqabili deyil. Biz onunla bağlı məsələləri Rusiya, Türkiyə, Avropa və hətta Livanla birlikdə Ermənistansız həll edirik. Hətta terrorçu olsa belə, ilk növbədə qadının həbsxanadan azad olunması Azərbaycanın və onun Prezidentinin hümanist ideyalara həmişə sadiq qaldığını növbəti dəfə sübut etdi. Maral Nacaryanın azad edilməsi Livanda və digər Şərq ölkələrində yaşayan ermənilərə nümunə rolunu oynayacaq. Xaricdəki ermənilər onlardan siyasi məqsədlər üçün istifadə edildiyinin fərqinə varacaqlar”.
Politoloq Maral Nacaryanın Livana verilməsi ilə əlaqədar siyasi şou yaratmaq istəyən bəzi qüvvələrə də səslənib: “Nacaryanın azad edilməsi beynəlxalq aləmdə Azərbaycanın nüfuzunun daha da artmasına və onun dost ölkələrdən ibarət əhatə dairəsinin genişlənməsinə yardım edəcək. Nəinki, onun terrorçu kimi mühakimə olunaraq həbsxanada qalması. Cənab Prezidentimizin Azərbaycanın xarici siyasətində atdığı addımlar haqqında siyasi sahədə savadı olan mütəxəssislər mühakimə yürütsünlər, ağa-qara deməyi özlərinə peşə etmiş diletantlar yox”.


Paylaş: