Sentyabrın 15-də sosial şəbəkələrdə Bakıdakı marketlərdən birinin qarşısında əlil arabasında oturmuş vəziyyətdə, maddi kömək istədiyi görüntüsü yayılan Ağdaş rayon sakini, Vətən müharibəsi iştirakçısı Quliyev Samit Samir oğlu əlillik üçün indiyədək heç bir müraciət etməyib.
Bunu açıqlamasında Dövlət Tibbi-Sosial Ekspertiza və Reabilitasiya Agentliyinin Mətbuat xidmətinin rəhbəri Tural Qurbanov deyib. O bildirib ki, hərbi həkim komissiyasında da Samitin müharibədə yaralanması ilə əlaqədar heç bir şəhadətnamə mövcud deyil:
"Özünün bildirdiyinə görə, o tam sərbəst hərəkət edir. 
Bununla belə, nazirliyin nümayəndələri onunla əlaqə saxlayıb və o bu gün sağlamlıq vəziyyətinin qiymətləndirilməsi üçün əyani müayinəyə dəvət edilib. Səhiyyə Nazirliyinin həkim komissiyası ilə birgə müayinə aparılacaq.
Məlumat üçün deyək ki, müharibədə aldığı yüngül xəsarətə görə “Azərsığorta” tərəfindən 550 manat sığorta ödənişi alıb".
Qeyd edək ki, daha əvvəl sosial şəbəkələrdə Samit Quliyevə əlillik dərəcəsinin verilmədiyi, onun isə çarəsizlikdən dilənməsi barədə məlumatlar və foto yayılmışdı.