Bakı Ağır Cinayətlər Məhkəməsində özünü 12-ci imam kimi təqdim ediərək 40 nəfərə qarşı dələduzluq etməkdə ittiham olunan Aqil Babayevin cinayət işi üzrə məhkəmə araşdırması davam etdirilib.

Prosesdə iş üzrə zərərçəkmiş qismində tanınmış Daşqın Aslanov dindirilib. Zərərçəkmişin dediyinə görə, Aqil Babayevin əməllərinə görə ona 70 min manat ziyan dəyib.

O, həmin pulu isə müxtəlif vaxtlarda şəhid ailələrinə kömək etmək, zəkat vermək və günahlarının bağışlanması üçün verdiyini deyib: "Buna 2000-ildən başlayaraq hər dəfə 3 şirvan bir, 5 şirvan bir, 100 manat bir, 200 manat bir zəkat vermişəm. Bundan əlavə ilk vaxtlarda evimi satıb 20 min dollar pul vermişəm. Ümumilikdə toplayanda 40 min manat pul edir. 2020-ci ilin oktyabr ayında isə ikinci Qarabağ müharibəsində döyüşən şəxslərin ailələrinə yardım etmək üçün Aqil Babayevə 8 min manat verdim. Bundan əlavə isə 10 min manat da günahlarımın bağışlanması, paklanmaq üçün vermişəm".

Aqil Babayevin vəkili Elnur Quliyev zərərçəkmiş şəxsin yaşını soruşduqda sonra məlum olub ki, o "İmam Mehdi"yə pul verdiyini iddia etdiyi dövrdə təxminən 19-20 yaşı olub: "Bu şəxs həmin illərdə əvvəl tələbə olub, sonra da əsgərliyə gedib. Necə ola bilər ki, 19-20 yaşlı gənc bu qədər pul verir. Sonra deyir ki, evimi satıb Aqil Babayevə vermişəm. Bundan əlavə Daşqın Aslanovun evini satıb Aqilə verməsi də yalandır".

Aqil Babayev də zərərçəkmişin dediklərini təkzib edərək, onun yalan danışdığını deyib. Bu zaman iclasda qalmaqal yaranıb. Zərərçəkmiş şəxslər Aqil Babayevə hücum etmək istəyiblər. Onlar ittiham olunan şəxsin hüquqlarını müdafiə edən vəkilləri də təhqir ediblər.

Məhkəmə nəzarətçilərinin müdaxiləsi ilə zərərçəkmiş şəxslər zaldan çıxarılıb.

Proses oktyabrın 25-də davam etdiriləcək.

***15:08

Özünü 12-ci imam kimi təqdim ediərək 40 nəfərə qarşı dələduzluq etməkdə ittiham olunan Aqil Babayevin cinayət işi üzrə məhkəmə prosesi qapalı keçirilib.

Bununla bağlı Bakı Ağır Cinayətlər Məhkəməsində sədrlik edən hakim Eldar İsmayılov qərar qəbul edib.

Belə ki, iclasdan əvvəl zərərçəkmiş şəxslər vəsatət qaldıraraq prosesin qapalı keçirilməsini tələb ediblər. Zərərçəkmiş şəxslər bunu məhkəmədə demədikləri sözlərin bəzi sayt və sosial şəbəkələrdə yayımlanması ilə əsaslandırıblar.

Təqsirləndirilən şəxs və vəkili Əli Hüseynov iclasın qapalı keçirilməsinin qanunsuz olduğunu, bununla media azadlığının pozulduğunu deyiblər. Məhkəmə onların vəsatətini təmin etməyib.

Bundan sonra zərərçəkmiş qismində tanınmış Daşqın Aslanova ifadə vermək təklif olunub. Zərərçəkmiş şəxs isə iclasın qapalı keçirilməyəcəyi halda ifadə verməkdən imtina edib. Digər zərərçəkmişlər də onu dəstəkləyiblər.

Bu zaman prokuror iclasın qapalı keçirilməsini təklif edib.

Sədrlik edən hakim Eldar İsmayılov bu hissədə prosesin qapalı keçirildiyini elan edib. Jurnalistlər zaldan çıxarılıblar.

Xatırladaq ki, “ŞaurmaN1” restoranlar şəbəkəsinin şəriki olmuş Aqil Babayev Daxili İşlər Nazirliyinin (DİN)Baş Mütəşəkkil Cinayətkarlıqla Mübarizə İdarəsi tərəfindən həbs edilib. Onun barəsində barəsində Cinayət Məcəlləsinin 178.4-cü (dələduzluq, külli miqdarda ziyan vurmaqla törədildikdə) maddəsi ilə ittiham elan edilib. İş üzrə zərərçəkmiş şəxslərə 2 milyon 500 min manat ziyan dəydiyi iddia olunur.