Xalq şairi, deputat Sabir Rüstəmxanlının oğlu Gündüz Rüstəmxanlı “Hacı Mazan” kimi tanınan Ramazan Hüseyn oğlu Zeynalovu məhkəməyə verib.

RegionXəbərləricom.az Lent.az-a istinadən məlumatına görə, əvvəlcə G. Rüstəmxanlı Nəsimi rayon Məhkəməsində iddia qaldırıb. İddiaya əsasən, o, yaşadığı çoxmənzilli binada liftdən istifadəyə qoyulan maneənin aradan qaldırılmasını tələb edib. Rayon məhkəməsi onun bu tələbini təmin edib.

Ancaq iddiaçının tələbinin təmin olunması qarşı tərəfin xoşuna gəlməyib. Buna görə, R. Zeynalov da öz növbəsində apellyasiya şikayəti verib.

“Hacı Mazan”ın iddiasına Bakı Apellyasiya Məhkəməsində hakim Namiq Cəfərovun sədrliyi ilə baxılacaq.

Qeyd edək ki, sözügedən lift məsələsi barədə əvvəllər də mətbuatda məlumatlar yayılıb. Söhbət Nəsimi rayonu Şövqiyar Abdullayev küçəsində yerləşən "İnam MTK"dan gedir. Mətbuatda yayılan məlumatlara görə, həmin binanın tikintisini həyata keçirən və orada yaşayan R. Zeynalov öz blokundakı liftə kod qoyub. Məqsəd isə həmin liftdən yalnız ailəsinin istifadə etməsi olub.