Meyxanaçı Rəşad Əmirovun (Rəşad Dağlı) cinayət işinin istintaqı başa çatıb və məhkəməyə göndərilib. İş artıq Ağır Cinayətlər Məhkəməsinə daxil olub və yaxın günlərdə icraata götürüləcək.

Məhkəmənin hazırlıq iclasının vaxtı hələlik məlum deyil.

R. Dağlının vəkili Bəhruz Xıdırov da konkret tarix açıqlamayıb:

“Bu barədə heç bir şey deyə bilmərəm. Hazırda məhkəməyə tələsirəm. Prosesi gözləyək”.

R. Dağlının bibisi qızı, jurnalist Könül Aypara qeyd edib ki, meyxanaçı ilə mərhum İsgəndər Mehdiyev arasında ölümlə nətiələnən münaqişənin səbəbi bəllidir və bu barədə vəkili açıqlama verib:

"O vaxtı nə deyilibsə, indi də odur. Yeniliklərlə bağlı heç bir məlumat verilmir. O cümlədən ailədaxili şəxsi məlumatlar da. Xüsusilə, mənə.

Mən media nümayəndəsiyəm deyə, suallarım cavabsız qalır”.

K. Ayparanın sözlərinə görə, söz ustadının sənət dostları lap əvvəldən R. Dağlının ailəsinə dəstək olublar:

“Sağ olsunlar, gəlib-gedirlər, maddi və mənəvi kömək mənada hər an ailəsinin yanındadırlar. Bir an da olsun onları, əsasən Rəşadın oğlu Yusifi nəzarətdən qaçırmırlar, heç vaxt unutmurlar. Rəşadın da yanına tez-tez görüşə gedirlər”.

Prosesə ictimai marağın böyük olması, buna görə də məhkəmənin gedişinə və çıxarılacaq hökmə təsirinə gəlincə, K. Aypara qeyd edib ki, qanun hamı üçün qanundur:

“Qanunda prosedur qaydaları necədirsə, hamıya şamil olunduğu kimi, Rəşad Dağlı da Azərbaycan Respublikasının vətəndaşı olduğu üçün bu qanunlar qarşısında cavab verməlidir. Aidiyyəti orqanlar hüquqi cəhətdən nə qiymət verəcəklərsə, verəcəklər. Əgər onun xeyrinə nə isə olacaqsa, olacaq. Bu, artıq bizlik deyil.

Suallarınızın yeganə cavabı var: bu da Azərbaycan qanunlarıdır. Konstitusiyamızda hansı qanunlar yazılıbsa, bütün vətəndaşlara şamil olunur, o cümlədən Rəşad Dağlıya da”.