Xərçəngə qarşı peyvənd tibbdə ən perspektivli sahələrdən biridir və preklinik tədqiqatların ilk nəticələri 2024-cü ilin sonuna qədər Rusiyada dərc olunacaq. 

Publika.az xəbər verir ki, Rusiyanın səhiyyə naziri Mixail Muraşko Sankt-Peterburq Beynəlxalq İqtisadi Forumunda TASS-a müsahibəsində yeni peyvəndin hazırlanmasından gözləntilərini bölüşüb. 

O deyib ki, bir neçə elmi qrupun, o cümlədən N. F. Qamaleya Epidemiologiya və Mikrobiologiya Elmi Mərkəzi, P. A. Herzen adına Moskva Elmi-Tədqiqat Onkologiya İnstitutu və N. N. Bloxin adına Onkologiya üzrə Milli Tibbi Tədqiqat Mərkəzinin birgə işi uğurlu nəticələrə ümid etməyə imkan verir. 

Bu tədqiqatlar dövlət tapşırıqlarının bir hissəsi kimi hökumət tərəfindən maliyyələşdirilir. Peyvəndin klinik sınaqlarının preklinik dövr başa çatdıqdan dərhal sonra başlanması gözlənilir. 

Xərçəngə qarşı peyvəndin hazırlanması bu ciddi xəstəliyə qarşı mübarizədə mühüm addımdır. Bu layihənin uğuru onkologiyada inqilabi dəyişikliklərə səbəb ola bilər.