Siyasi partiyalar sentyabrın 1-də keçiriləcək növbədənkənar parlament seçkilərinə iddi hazırlaşır. Qanuna müvafiq olaraq partiyalar addımlar atır, seçkidə qalib olmaq üçün əllərindən gələni edəcəklərini bildirirlər. 

Mövzu ilə bağlı Yenisabah.az-a danışan Klassik Xalq Cəbhəsi Partiyasının sədri Mirmahmud Mirəlioğlu bildirib ki, rəhbərlik etdiyi partiya bu seçkidə daha çox namizədlə iştirak edəcək və artıq müvafiq sənədlər MSK-ya göndərilib: 

“Növbədənkənar parlament seçkilərində iştirak etmək üçün sənədlərimizi də təqdim etmişik, Mərkəzi Seçki Komissiyasının iş qrafkinə uyğun olaraq sənədlər göndərilib. Növbəti sənədlər də digər mərhələyə kimi hazırlanacaq. Hazırda bu istiqamətdə işlər gedir”. 

M.Mirəlioğlu budəfəki parlament seçkilərində müxalifət nümayəndələrinin də mandat alacağı ilə bağlı iddialardan danışıb: 

“Hər dəfə seçki öncəsi deyirlər ki, “hakimiyyət müxalifət nümayəndələrinə “yaşıl işıq” yandıracaq”. Yəni bu tip fikirlər həmişə gündəmi zəbt edən məsələlərdən olur. Seçkiqabağı hər zaman bu məsələ aktuallaşır. Son nəticə də ortadadır. Həmişə diqqət cəlb etmək üçün belə fikirlər müxtəlif şəxslər tərəfindən səsləndirilir”.