Prezident İlham Əliyevin 4 iyul 2019-cu il tarixli Fərmanına əsasən Əmək və Əhalinin Sosial Müdafiəsi Nazirliyinin tabeliyində “Əmək Bazarı və Sosial Müdafiə Məsələləri üzrə Milli Observatoriya” publik hüquqi şəxs yaradılıb. Milli Observatoriyanın təyinatı əmək bazarı və sosial müdafiə sahələrində normativ hüquqi aktların, inkişaf konsepsiyalarının, məqsədli proqramların hazırlanması və həyata keçirilməsidir. Əmək bazarının cari və perspektiv vəziyyətinin qiymətləndirilməsi, strateji məşğulluq sahələrinin, onların gələcək inkişaf meyillərinin müəyyən edilməsi kimi strateji sahələr də bu qurumun funksiyaları arasındadır. Bir sözlə, Milli Observatoriya xalqa daha optimal xidmət etmək üçün yaradılıb.

Ovqat.com-un əldə etdiyi bir material isə tamamilə başqa mətləblərdən xəbər verir.

Belə ki, Milli Observatoriyada 6 il sürücü işləmış Qarabağ qazisi Şərifov Elmar Vüqar oğlunun Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Dövlət nəzarəti məsələləri şöbəsinin müdiri cənab Kərəm Həsənova yazdığı məktubda qurumu idarə edənlərin əhli-kef adamlar olduğundan bəhs olunur. Şikayətçinin iddiasına görə, Milli Observatoriyanın İdarə Heyətinin üzvü Hasil Vasif oğlu Abbasov onu sözün həqiqi mənasında qul kimi işlədib, dövlətin avtomobilini və yanacağını, habelə işçiləri şəxsi məqsədləri üçün istismar edib.