Türkiyənin Cümhuriyyət Xalq Partiyasının (CHP) sabiq lideri Kamal Kılıçdaroğlu İYİ Partiyanın keçmiş sədri Meral Akşeneri sərt tənqid edib.

“Cebheinfo.az” xəbər verir ki, o, “altılı masa”dakı keçmiş ortağına “od püskürüb”.

Kılıçdaroğlu “TV100” telekanalında qonaq olarkən Akşeneri hədəf alıb:

“Sinan Oğan həm “normallaşdı”, həm də zənginləşdi. Bunu hamımız bilirik. Meral Akşener də “normallaşdı”. Artıq onun da “normallaşdığını” hər kəs bilir. Əslində partiyalar iqtidar olmaq istəməli, bunun üçün mübarizə aparmalıdır. Normallaşma siyasəti aparmaqla iqtidar olunmur”.

O, 2023-cü il may ayında keçirilən prezident seçkilərindəki məğlubiyyətə görə də Akşeneri ittiham edib:

“Seçkinin məğlubiyyətinə görə bütün yük mənim çiyinlərimdədir. Heç kim Akşeneri ittiham etmir. Axı nə üçün masadan ayrıldı? Hansı səbəbə görə masaya qayıtdı? Masaya nə üçün “qumar masası” dedi? Niyə Rəcəb Tayyib Ərdoğanla görüşdü?”.

Aparıcının Meral Akşenerin “xəyanət” sözünə görə onu məhkəməyə verəcəyini xatırlatması üzərinə Kılıçdaroğlu belə cavab verib:

“Səhv deyirəm?”.

Qeyd edək ki, Meral Akşenerin efirdə söylədiyi sözlərinə görə Kamal Kılıçdaroğlunu yenidən məhkəməyə verəcəyi açıqlanıb.