"Bir neçə gün öncə Nazirlər Kabineti “Ali təhsil müəssisələrində və magistratura səviyyəsi üzrə Azərbaycan Milli Elmlər Akademiyasında yeni maliyyələşmə mexanizminin tətbiq edilməsi haqqında” qərar imzalamışdı. Qərara əsasən təhsilin bütün pillələrində hər bir təhsilalana düşən təhsil xərclərinin miqdarı 2010-cu illər müqayisədə artırılmışdı. Buna sözüm yox, məsələ odur ki, Nazirlər Kabineti olmayan ixtisaslara hər bir təhsilalana düşən təhsil xərclərinin miqdarını artırmışdı".
Bunu təhsil eksperti Kamran Əsədov bildirib.

Onun sözlərinə görə, Nazirlər Kabineti olmayan ixtisasın xərclər simetasını müəyyən edib:

"Belə ki, Nazirlər Kabinetinin 11 fevral 2019-cu il tarixli qərarı ilə Ali təhsilin bakalavriat (əsas (baza ali) tibb təhsili) səviyyəsi üzrə ixtisasların (proqramların) təsnifatı"ında ixtisasların sayı azaldılıb. Qərarla mövcud 175 ixtisas sayı 148-ə endirilib, o cümlədən 46 yeni ixtisas yaradılıb, 70-ə yaxın ixtisas isə birləşdirilib və ya ləğv edilib.

Misal üçün yeni təsnifatda Kitabşünaslıq, Kinoşünaslıq, Teatrşünaslıq, Dağ – mədən mühəndisliyi, Geologiya mühəndisliyi, Elektrik mühəndisliyi, Cihazqayırma mühəndisliyi, Baytarlıq, Tibbi profilaktika, Malicə işi, Dünya iqtisadiyyatı, Kommersiya, Mühasibat uçotu və audit, Rəqas müəllimiyi və bir çox ixtisaslar olmasa da, təhsilalana düşən təhsil xərclərinin miqdarı siyahısında bu ixtisasların adı var. Yəni, olmayan ixtisasın xərclər simetası müəyyən olunub".

Ekspert bildirib ki, yanlış anlaşılmalara səbəb olmamaq üçün yeni maliyyələşmə mexanizmi bu il qəbul olunan digər qərarla uyğunlaşdırılmalıdır:

"Maraqlıdır ki, “Ali təhsil müəssisələrində və magistratura səviyyəsi üzrə Azərbaycan Milli Elmlər Akademiyasında yeni maliyyələşmə mexanizminin tətbiq edilməsi haqqında” qərar 3 oktyabr 2019-cu ildə imzalanıb və 2019-cu il sentyabrın 1-dən tətbiq edilir. Amma Ali təhsilin bakalavriat (əsas (baza ali) tibb təhsili) səviyyəsi üzrə ixtisasların (proqramların) təsnifatı" haqqında qərar 11 fevral 2019-cu il tarixində imzalanıb və 2019-cu il 15 sentyabr tarixindən qüvvəyə minib.

Hesab edirəm ki, “Ali təhsil müəssisələrində və magistratura səviyyəsi üzrə Azərbaycan Milli Elmlər Akademiyasında yeni maliyyələşmə mexanizminin tətbiq edilməsi haqqında” qərar Ali təhsilin bakalavriat (əsas (baza ali) tibb təhsili) səviyyəsi üzrə ixtisasların (proqramların) təsnifatı "haqqında qərara yenidən uyğunlaşdırılmalıdır".


Paylaş: