“Konstitusiya islahatları” deyəndə, dərhal proporsional seçki sisteminin bərpasını ağla gətirilməsi müəyyən qədər bəsit yanaşmadır. Çünki daha vacib məqamlar var”.

Bunu Milli Məclis üzvü Elçin Mirzəbəyli deyib.

O qeyd edib ki, Konstitusiya islahatlarının zəruriliyi ilə bağlı artıq bir neçə ildir ki, əsasən, media resurslarında və siyasi partiyalarda müzakirələr aparılır:

“Əsas Qanuna tez-tez əlavə və dəyişikliklər edilməsinin zəruri olduğunu düşünmürəm. Çünki bu halda bir sıra hüquqi-normativ akta da yenidən baxmaq zərurəti yaranır. Həm də “konstitusiya islahatları” deyəndə, dərhal proporsional seçki sisteminin bərpasının ağla gətirilməsi müəyyən qədər bəsit yanaşmadır. Çünki daha vacib məqamlar var. 

Məsələn, Naxçıvan Muxtar Respublikası ilə bağlı. Naxçıvan Ali Məclisinin adındakı “ali” sözü həmin orqanın real hüquqi statusundan yüksəkdir və muxtar respublikanın parlamenti, sadəcə “Məclis” adlandırılmalıdır. 

İndi Naxçıvanda nə xalq deputatları sovetləri var, nə də yerli məclislər. Əgər yerlərdə məclislər yoxdursa, təbii ki, olmayan məclislərin “ali”si də ola bilməz.

Digər tərəfdən, Azərbaycanda ali qanunvericilik orqanı “Milli Məclis” adlanır. Belə olduğu təqdirdə, Azərbaycanın inzibati ərazi subyektlərindən birinin qanunverici orqanı “Ali Məclis” adlana bilməz. Çünki “Ali” daha yüksək deməkdir

Bundan başqa, Azərbaycanda prezident üsul-idarəsinin mövcud olmasına baxmayaraq, Naxçıvan MR-in ali vəzifəli şəxsi Naxçıvan Ali Məclisinin sədri hesab olunur. Bu, tamamilə dövlət quruluşumuzun və dövlət idarəçilik sistemimizin hüquqi fəlsəfəsinə zidd olan bir reallıqdır. Digər tərəfdən, bəlli olduğu kimi, Azərbaycan unitar respublikadır və unitar dövlətlərin tərkibində muxtar subyektlərin olmasına nadir hallarda olsa da rast gəlinir. Müasir dövrdə unitar dövlət quruluşu, dövlətin ərazi bölgüsü formasından daha çox vahid siyasi hakimiyyət anlayışı ilə ifadə olunur. Yəni unitar dövlətdə inzibati ərazi subyektləri müstəqil siyasət yürütmək hüququna malik olmurlar”.