“Uzun illər bir vəzifədə işləmək durğunluğa səbəb ola bilər”.
Bu sözləri Yenisabah.az-a “Konstitusiya” Araşdırmalar Fondunun prezidenti Əliməmməd Nuriyev uzun illər bir vəzifədə işləyənlərin əvəzlənməsi ilə bağlı təkliflərə münasibət bildirərkən deyib.

Onun sözlərinə görə, vəzifələrdə rotasiya vacib məsələdir. “Rotasiyaların baş verməsi, bununla bağlı qanunverici əsaların yaranması çox yaxşı olardı”, deyən Əliməmməd Nuriyev bununla belə, yaşlı olsa da, təcrübəli kadrların işdən çıxarılmasını doğru hesab etmir.

“Hər kəsə fərdi yanaşmaq lazımdır. Əgər şəxsin yeni yanaşma təqdim etmək, idarəetmədə təkmilləşdirmə aparmaq imkanı varsa, buna uyğun həmin şəxsin potensialından istifadə etmək lazımdır. Ümumiyyətlə hesab edirəm ki, təcrübəli insanların potensialı böyük sərvətdir və bundan istifadə etmək lazımdır. Bir şərtlə ki, həmin şəxslər yeniliyə, mövcud çağırışlara cavab verə bilsinlər. Amma hansısa məmur tükənibsə, artıq fayda verə bilmirsə, özü başa düşməlidir ki, artıq vəzifədən getmək vaxtıdır. Yaxşı olardı ki, bu cür məmurlar könüllü istefa versinlər.

Eyni zamanda bir məmurun uzun müddət eyni vəzifədə qalması onu passivləşdirir. Ona görə də müəyyən müddətdən sonra rotasiyaların baş verməsi yaxşı olardı. Bildiyim qədər bununla bağlı yeni dövlət qulluğu məcəlləsi və fəaliyyət planı hazırlanır. Buna uyğun olaraq bütün məsələlər həllini tapacaq. Ümnumiyyətlə, bütün seqmentlərdə ishlahatları zəruri hesab edirəım. Xüsusilə idarəetmədə islahatlar kompleks şəkildə həyata keçirilərsə, səmərəli effekt verə bilər”, - deyə Əliməmməd Nuriyev vurğulayıb.


Paylaş: