Qazax Rayon İcra Hakimiyyəti son günlər xalq artisti Röyanın gündəmə gətirdiyi məsələ - bir imkansız ailənin evinin təmirini üzərinə götürməsindən sonra yayılmış ittihamlar barəsində açıqlama ilə çıxış edib:

"Cəfərova Əsmər Əsgər qızı barəsində yayılan yazılarda qeyd edilir ki, Əsmər nənənin evi qəzalı vəziyyətdədir, təmirə ehtiyacı var və lakin heç kim onun müraciətinə baxmır. Həmin yazıları dərc edənlərə demək istəyirik ki, Əsmər Cəfərovanın Quşçu Ayrım kəndində yerləşən 1970-ci illərdə tikilmiş, bir mərtəbədən ibarət iki otaqlı fərdi yaşayış evinin dam örtüyünün təmiri üçün elə bu ilin mart ayında Rayon İcra Hakimiyyəti tərəfindən 20 ədəd şifer verilib. Digər qəzalı vəziyyətdə olan evlər kimi Ə.Cəfərovanın evi də təmirə ehtiyacı olan evlərin siyahısına qeyd edilib. Bundan başqa, ailəyə məxsus Qazax şəhəri, N.Nərimanov yaşayış massivində yerləşən fərdi yaşayış evi də var.
Yazılarda bir fikir də səslənir ki, Əsmər Cəfərovanın oğlu şəhid olub və şəhid ailəsinə qayğı göstərilmir. Sadəcə istər bu videonu paylaşan, istərsə də həmin videodan məqsədli şəkildə istifadə edib yazıları yayımlayan insanlara demək istəyirik ki, Qazaxda nəinki şəhid ailələri, eləcə də hər bir vətəndaş diqqət mərkəzindədir. Bu gün Əsmər nənənin oğlu Cəfərov Murad Ayvaz oğlu şəhid olmasa belə (2001-2002-ci illərdə hərbi xidmətdə olub və hərbi xidmətdən qayıtdıqdan sonra 2004-cü ildə vərəm xəstəliyindən vəfat edib) ona olan münasibət hər bir Qazax vətəndaşına olan münasibətlə eynidir". //moderator.az//



Paylaş: