Ötən gün Elmi-Tədqiqat Ağciyər Xəstəlikləri İnstitutunda iki nəfərin ölməsi cəmiyyət arasında ciddi müzakirələrə səbəb olmaqla bərabər, narahatlıq yaradıb.

Məsələ ilə bağlı mətbuata açıqlama verən Elmi-Tədqiqat Ağciyər Xəstəlikləri İnstitutunun direktoru Həqiqət Qədirova ölənlərin ağır xəstə olduqlarını bildirib və ölüm faktını normal hadisə adlandırıb. H.Qədirova bu məlumatı ilk dəfə mətbuata ötürən şəxsi “yaramaz” adlandırıb.

Məsələ ilə bağlı Oxu.Az-a müraciət edən hüquqşünas Samir Zeynalov Elmi-Tədqiqat Ağciyər Xəstəlikləri İnstitutu ilə bağlı bir sıra iddialar irəli sürüb.

Belə ki, ötən gün Elmi-Tədqiqat Ağciyər Xəstəlikləri İnstitutunda bir gündə gerçəkləşmiş iki ölüm faktı ilə bağlı mətbuata məlumat verdiyini deyən vəkil S.Zeynalov bunu bənzər halların yenidən yaşanmaması üçün etdiyini deyib.

S.Zeynalov iddia edir ki, institutda həkim-reanimatoloq yoxdur və ağır xəstələri tibb bacıları və təmizliyə baxan personal qəbul edir:

“Dünən sizin saytda Elmi-Tədqiqat Ağciyər Xəstəlikləri İnstitutunda bir gündə gerçəkləşmiş iki ölüm faktına dair məlumat dərc edilib. Direktor Həqiqət Qədirova bu məlumatı ilk dəfə mətbuata ötürdüyüm üçün məni “yaramaz” adlandırıb.

Xülasə, qeyd etmək istəyirəm ki, institutda baş vermiş ölüm hadisələrinin səbəbi həkim yoxluğu ilə əlaqədardır. Belə ki, artıq uzun müddətdir ki, institutda həkim-reanimatoloq çalışmır. Gələn ağır xəstələri tibb bacıları, “sanitarkalar” qəbul edir.

Onu da qeyd edim ki, institutda ölüm hallarının yaşadığı gün digər üçüncü xəstənin də həyatı təhlükədə olub. Həmin xəstə, Samux rayon sakini Kərimli Kənan Avaddin oğlu yaxınları tərəfindən dünən gecə saat 02:00 radələrində Avrasiya Hospitalına təxliyyə edilib. Adıçəkilən klinikanın həkim-reanimatoloqu Vüqar Səfərov həmin xəstənin həyatını xilas edib”.

O iddia edir ki, İnstitutun direktoru Həqiqət Qədirova baş vermiş ölüm faktlarını normal hadisə kimi dəyərləndirir və gerçək həqiqətləri ictimaiyyətdən gizlədir:

“Bir daha qeyd etmək istəyirəm ki, Elmi-Tədqiqat Ağciyər Xəstəlikləri İnstitutunda uzun müddətdir ki, həkim-reanimatoloq yoxdur. Reanimasiya şöbəsinin müdiri həkim-reanimatoloq Fikrət həkim xəstəliyi ilə əlaqədar olaraq əmək qabliyyətini müvəqqəti olaraq itirib və hazırda məzuniyyətdədir. Onu da əlavə olaraq diqqətinizə çatdırım ki, hazırda başqa bir xəstə də komadadır və hər an həyatla vidalaşa bilər”.

Xatırladaq ki, Elmi-Tədqiqat Ağciyər Xəstəlikləri İnstitutu “Tibbi Ərazi Bölmələrini İdarəetmə Birliyi”nin (TƏBİB) tərkibindədir.

İrəli sürülən iddialara TƏBİB-in mətbuat xidmətindəən verilən cavabda isə bildirilib ki, hazırda tibb müəssisələrində monitorinqlər aparıldığından bu barədə məlumat verə bilmirlər:

“TƏBİB-in tərkibində olan müəssisələrin təhvil-təslim prosesləri hələ davam etdiyindən və xəstəxanaların publik hüquqi şəxs statusuna keçid dövrü olduğundan, hazırda TƏBİB-in monitorinq İşçi qrupları tibb müəssisələrində fəaliyyətini davam etdirir.

Bu və digər müəssisələr barədə yalnız İşçi qrupların fəaliyyəti başa çatdıqdan sonra məlumat vermək mümkündür. Bu dövr ərzində isə bütün müəssisələrdə iş prosesi əvvəlki qaydada davam etdirilir”.


Paylaş: