Fərdi yaşayış evlərinin dövlət qeydiyyatına alınması və mülkiyyət hüququnun verilməsi prosesi illərdir yubansa da, məsələ yenidən gündəmə gəlib.
Cebhe.info xəbər verir ki, bir müddət əvvəl Suraxanı rayonu Hövsan qəsəbəsindəki sənədsiz evlər müvafiq ərazi nümayəndəliyi və ya bələdiyyə tərəfindən tək-tək qeydiyyata alınaraq, nömrələnib. Amma proses evlərə qeydiyyat şahadətnaməsi (“kupça”) verilməsiylə nəticələnməyib. Son günlər isə prosesə yenidən start verilib.
Hovsan bələdiyyəsi tərəfindən qəsəbədəki binaların divarlarına sənədsiz evlərin sənədləşməsi ilə bağlı elanlar vurulub. Elanda bildirilir ki, sənədsiz evlərin dövlət qeydiyyatına alınması ilə əlaqədar sakinlər təcili Hövsan bələdiyyəsi və ya da Hövsan qəsəbə nümayəndəliyinə müraciət etməlidirlər. Elanda o da qeyd olunur ki, müraciət edən şəxslər özləri ilə işıq, qaz və su sayğaclarının qəbzlərini götürməlidirlər. Son müraciət tarixi isə bu il 30 aprel göstərilib.

Qeyd edək ki, bundan əvvəl də dəfələrlə Hövsan Bələdiyyəsi tərəfindən sakinlərə bunabənzər xəbərdarlıq edilib. Sakinlər hər dəfə xəbərdarlıqdan sonra bələdiyyədə qeydiyyata alınıblar, lakin nəticsi olmayıb.
Maraqlıdır, sənədsiz evlərin qeydiyyata alınması bu dəfə reallaşacaqmı?
Hövsan bələdiyyəsinin sədri Elbrus Xəlilov Cebhe.info-ya açıqlamasında bildirib ki, ötən il ölkə başçısının verdiyi sərəncama görə, sənədsiz evlərin qeydiyyata alınması prosesinə təkan verilib. Bələdiyyə sədri müvafiq qurumların göstərişi ilə qəsəbə sakinlərinə elan vasitəsilə müraciət edildiyini deyib:
“2019-cu ilin iyulunda ölkə başçısı İlham Əliyev 37 nömrəli sərəncam imzalayıb. Tədbirlər planına uyğun olaraq bələdiyyələrdə və icra nümayəndəliklərində sənədsiz evlərin sənədləri yığılır. Qaz, işıq və su qəbzləri buna görə tələb olunur. Əgər ev bələdiyyədə qeydiyyatdadırsa, heç bir sənəd tələb olunmur. Sadəcə şəxs aprelin sonuna qədər bələdiyyəyə gəlib məlumat verməli və müvafiq blankı doldurmalıdır. Biz həmin müraciətləri yerli ekspert komissiyasına, onlar isə müvafiq quruma təqdim edəcəklər”.
Xatırladaq ki, Prezident İlham Əliyev sənədsiz evlərin qeydiyyata alınması haqda ötən ilin iyulunda sərəncam imzalayıb və lazımi qurumlara göstəriş veriblib. Buna əsasən sənədsiz evlərin qeydiyyata alınması ilə bağlı Bakıda rayon icra hakimiyyətlərində komissiyalar yaradılıb. Sənədsiz evlərin ən çox tikildiyi rayonlar Qaradağ, Sabunçu, Suraxanı və Abşerondur.


Paylaş: