Xəbər verdiyimiz kimi, əsasən Yaponiyada saxlanılan, dünysnın ən bahalı ətinə malik olan "Vaqiu" cinsi heyvanlardan Azərbaycana da gətirilib

Ətinin kilosu 1000 dollardan satılan və bazarda “mərmər ət” adı ilə tanınan bu heyvanlardan hələlik ölkəmizə ancaq iki baş gətirilib. Lakin biri dişi, digəri isə erkək olan bu heyvanların ölkəmizə kəsilmək üçün deyil, nəslinin artırılması məqsədilə gətirildiyi bldirilir. Yəni Azərbaycana ilkin təcrübə məqsədi ilə gətirilən bu heyvanların birindən toxum almaq, digərini isə mayalandırıb bala almaq nəzərdə tutulub. Lakin yeni növ koronavirusun “gözlənilməz qonaq” kimi özünü ortaya atması bu işə mane olub. Beləliklə, menyusuna 1000 dollarlıq ət daxil etmək istəyənlər gözləməli olacaqlar.

Cebhe.info-ya özəl açıqlamasında Kənd Təsərrüfatı Nazirliyi yanında Dövlət Toxum Fondunun Respublika Süni Mayalandırma Mərkəzinin direktoru Ramiq Abbasov yeni növ koronavirusun cins heyvanları artırma işinə də mane olduğunu deyib:

“Mart ayının 1-dən “Gilan Holdinq” 2 baş “Vaqiu” cinsindən olan heyvan gətirib. Bildiyiniz kimi, onlardan biri dişi, digəri isə erkəkdir. Biz Heyvandarlıq Elmi Tədqiqat İnstitutunda bu cinsləri artırmaq üçün erkək olandan toxum alıb mayalandırma prosesini həyata keçirmək istəyirdik. Məqsəd həmin heyvanları ölkəmizdə çoxaltmaq təcrübəsini sənaqdan keçirmək idi. Lakin koronavirusun ortaya çıxması ilə hər şey dayandı. Hələlik heç bir şey edə bilmirik. Bu heyvanları artırmağı sınaqdan keçirməliyik. Əgər baş tutarsa, sözügedən heyvanlardan yenə gətirmək planlaşdırılır ki, ölkəmizdə də bu cinslərdən olsun”.


Paylaş: