TƏBİB koronavirus xəstəliyindən qorunmaq üçün bərbər və gözəllik salonlarına gedərkən vətəndaşların diqqət etməli olduqları məqamları açıqlayıb.

Bu xidmətdən yararlanmaq istəyən vətəndaş salona getmədən öncə randevu almalıdır.

Bərbər və gözəllik salonuna gedərkən mütləq maska taxmaq lazımdır. Məkanda olduğunuz müddətdə ehtiyac olmadan maskanı çıxarmamaq tövsiyə olunur.

Məkana çatan zaman əlləri sabunla yumaq və ya dezinfeksiya etmək lazımdır. Digər müştərilərlə ən azı 3-4 addım məsafə saxlamaq lazımdır.

Səthlərə və ortaq istifadə məqsədi ilə qoyulan qəzet, jurnal və s. əşyalara toxunmayın. Toxunduğunuz halda əllərinizi yuyun və ya spirtləyin.

Yemək və içmək üçün heç nə istəməyin. Dəsmalların və ya istifadə olunan alətlərin sizə aid olduğuna diqqət edin. Əşyalar daha öncə istifadə edilibsə, personala xəbərdarlıq edin.

Sizə hansı insanların xidmət etdiyini qeyd edin. Bununla, sizin və ya xidmət personalının Covid-19 testinin pozitiv çıxacağı halda təmaslarının aşkarlanması daha asan olacaq. Mümkünsə, kredit kartı və ya bank kartı ilə təmassız ödəniş edin.


Paylaş: