Sosial şəbəkələrdə məişət avadanlıqları satan mağazalardan, xüsusilə də “Kontakt Home”dən şikayətlərin ardı-arası kəsilmir. Müştərilər alınan məhsulların yararsız çıxmasından, adı çəkilən mağazalar şəbəkəsinin servis xidmətindən daha çox gileylənirlər. Sevinərək aldığı məhsulda problemlər çıxandan sonra kömək istəyən müştərini çarəsiz buraxmaq “Kontakt Home”də artıq neçə illərdir dəb halını alıb.

Lent.az xəbər verir ki, növbəti belə şikayət alınan məhsulun sözügedən mağazalar şəbəkəsindən müştəriyə gec təhvil verilməsi və quraşdırılmaması ilə bağlıdır. Sosial şəbəkədə paylaşım edən vətəndaş mağazadan bu il mayın 23-də aldığı kondisionerin iyunun 13-də ona təhvil verildiyini bildirib. Şikayətçinin sözlərinə görə, şirkətin əməkdaşları məhsulu 21 gün sonra gətirsələr də, quraşdırmayıblar. Paylaşımı edən sosial şəbəkə istifadəçisi hər gün “Kontakt Home”nin *6060 qaynar xəttinə zəng vurduğunu, lakin hər səfər “məlumatımız yoxdur, sizinlə təkrar əlaqə saxlayacağıq” kimi cavab aldığını qeyd edib.

Qeyd edək ki, bir müddət öncə elektriklə işləyən məişət avadanlıqları satan mağazaların, xüsusən də “Kontak Home”nin insanları aldatması ilə bağlı yazı vermişdik.


Paylaş: