“3 martdan etibarən dərslər dayanıb, bundan ən çox əziyyət çəkən 11-ci sinif şagirdləridir”.

Bu barədə təhsil eksperti Kamran Əsədov bildirib:

“Dərslər ilə bərabər imtahanlar da mövcud səbəbdən dəfələrlə təxirə salınır. İmtahanlar təxirə salındıqca, abituriyentlərin vəziyyəti gərginləşir.

Məlumdur ki, Bakı şəhəri və regionlarda bir çox şagirdlər imtahan verib, rahatlıqla 2-ci mərhələyə hazırlaşırlar. Amma çox sayda şagird hələ də birinci mərhələni gözləyir.

İmtahan yükü isə bütün abituriyentlər arasında ən çox rus bölməsinin üzərinə düşür. Belə ki, rus bölməsinin abituriyentləri əvvəlcə Azərbaycan dilindən imtahan verəcəklər, ondan keçsələr, ardınca 1-ci mərhələ, sonra da 2-ci mərhələ üçün imtahan verəcəklər. Azərbaycan dili və 1-ci mərhələ müəyyən qədər asan olsa da, 2-ci mərhələ üçün hazırlaşmaq lazımdır və buna da vaxt lazımdır.

Hesab edirəm ki, imtahanın hər kəsin öz oxuduğu məktəb və yaşayış yerinə yaxın məktəbdə verdiyini şəhərə çıxışın məhdudlaşdırıldığını nəzərə alsaq, mövcud vəziyyətdə bütün ərazilərdə imtahanları keçirmək lazımdır”.

Ekspert deyir ki, isti hava şəraiti, çölə çıxmaq ilə bağlı məhdudlaşdırma, hazırlıq kursları və repetitor fəaliyyətindəki qadağalar şagird və abituriyentlərdə ciddi psixoloji gərginlik yaradıb:

“Ümid edirəm ki, 17 iyulda bütün 1-ci mərhələ-buraxılış imtahanları keçirilməyən ərazilərdə imtahanlar təşkil olunacaq və şagirdlər bu ağır yükdən xilas olacaqlar”.


Paylaş: