Mingəçevir Şəhər Polis Şöbəsinin əməkdaşları şəhərin inzibati ərazisində yaşadığı evi qanunsuz olaraq tərk edən aktiv koronavirus xəstəsi aşkarlayıblar. DİN-in Mətbuat Xidmətinin Şəki regional qrupunun məlumatına görə, koronavirus testinin nəticəsi pozitiv çıxan şəhər sakini Yaqub Rəhimov ev şəraitində müalicə alır, lakin buna rəğmən qaydaları pozaraq yaşadığı ünvanı tərk edib.

Şəxsin koronavirus xəstəsi olduğu müəyyən edildikdə əraziyə həkim briqadası dəvət edilib. Həmin şəxs təcili tibbi yardım avtomobilinə mindirilərək yaşadığı ünvana aparılıb. Mingəçevir Şəhər Polis Şöbəsində Y.Rəhimov barəsində Cinayət Məcəlləsinin 139.1-1-ci maddəsi ilə cinayət işi başlanılıb və o, polis nəzarətinə götürülüb. Y.Rəhimovun əlaqədə olduğu şəxslərin müəyyən edilməsi istiqamətində tədbirlər görülür.

Təəssüf ki, belə məsuliyyətsiz davranışların şahidi oluruq. Xəstə olduğunu bildiyi halda evi tərk edib kütlə arasına çıxan şəxs neçə insanın həyatını təhlükəyə atdığının fərqinə varmır. Səbəb nədir? Cahillik, virus barədə məlumatların kasad olması, yoxsa, məsuliyyətsizlik?

Həkim Fəxranə Hüseynzadə “Şərq”ə açıqlamasında bu məsələdə əskik gələnin məhz vətəndaş məsuliyyəti olduğunu dedi:

- Bu, məsuliyyətsiz bir hərəkətdir. Birincisi, məsuliyyətsizlik, ikincisi də, eqoistlik. Eqoist olmayan insan özünü düşünməsə də, ətrafdakıları düşünər. Bilə-bilə ki koronavirus xəstəsidir, evdən çıxıb harasa getmək başqalarını real təhlükəyə atmaqdır. Bəziləri səbəb gətirir ki, səbrimiz daralır, darıxırıq, məncə, ümumi mənafeyimiz naminə dözməliyik. Anam həkimdir, xroniki xəstəliyi var deyə aylardır evdən çıxmır. Deməli, məsuliyyət daşıdığını bilir. Məsuliyyətsiz insanların olacağını da istisna etmirəm, əlbəttə hamı eyni ola bilməz. Amma daha bu qədər də yox. Artıq 5 aydır koronavirusla mübarizə aparılır. İndiyədək bilməyənlər, inanmayanlar da bilir və inanmağa başlayıblar. Təbliğatın, maarifləndirmə işinin zəif olduğunu da deyə bilmərəm. Hər yerdə plakatlar, xəbərdarlıq elanları vurulub, televiziyada daim sosial çarxlar, videolar, xəbərdarlıqlar efirə verilir. Nə qədər dünyadan bixəbər olmalısan ki, xəstəlik haqqında məlumatsız qalasan. Mən o vətəndaşın hərəkəti yalnız məsuliyyətsizlik və eqoizmlə bağlayıram.

F.Hüseynzadə evdə müalicə alan xəstələrə yerli poliklinika həkimlərinin nəzarət etdiyini bildirdi:

- Evdə müalicə alan xəstələr poliklinikada qeydiyyata alınır və onlara müalicə təyin edilir. Konkret bu sahədə çalışmadığım üçün poliklinika həkimlərinin evdə müalicə alanlara hansı formada nəzarət etdiyini deyə bilmərəm. Amma vətəndaş koronavirusdan müalicə alırsa, fərqi yoxdur, evdə, ya xəstəxanada, xəstə olduğunu və yoluxdurma riski daşıdığını anlamalıdır. Daha buna həkim neyləsin? Həkim xəstənin evinini qarşısınsa növbə çəkə blməz. Amma sizə bir missal deyim, məsələn Qazaxıstanda koronavirus xəstəsinin sakini olduğu bina tamamilə polis nəzarətinə alınır. Tutalım, hansısa binanın bir blokunda xəstə varsa, polis oranı daim nəzarət, müşahidə altında saxlayır, beləliklə, o şəxslərin mənzllərini, binanı tərk etməsinə icazə vermirlər. Bizdə ölüm halları baş verdikdə bu cür nəzarət mexanizmi işə düşür. Paytaxtda və bəzi bölgələrdə belə hallar olub, koronavirusdan dünyasını dəyişən adamın ev, mənzili nəzarətə götürülüb, polis kənar şəxslərin əraziyə yaxınlaşmasının qarşısını alıb. Yaxşı olardı ki, belə bir nəzarət mexanizmi koronavirus xəstələri ilə bağlı da tətbir edilərdi və xəstələrin yaşadığı ərazi nəzarətdə saxlanardı. Çünki hazırda evdə müalicə alan xəstələr çoxdur. Evdə müalicəyə icazə verildikdən sonra belə hallar artıb. Bunu nəzərə alaraq polis nəzarətinin gücləndirilməsi daha məqsədəuyğundur. Yenə də vətəndaşlarımız məsuliyyət hissini itirməməlidir. Və təhülkənin yayılmasına rəvac verməməlidrilər.


Paylaş: