Xəbər verdiyimiz kimi, 15 sentyabrdan etibarən məktəblərdə tərdris prosesi mərhələlərlə bərpa olunacaq.

Təhsil naziri Emin Əmrullayev yeni tədris ilinin başlanmasına həsr olunmuş brifinqdə bildirib ki, 15 sentyabrdan etibarən ibtidai siniflər tədrisə əyani cəlb olunacaqlar.

Bu, həftədə 2-3 dəfə olmaqla baş verəcək. Oktyabrın 1-dən etibarən isə yuxarı sinif şagirdləri eyni qaydada əyani tədrisə başlayacaqlar.

Maraqlıdır, belə vəziyyətdə yoluxma ilə bağlı təhlükə tam aradan qalxacaqmı? Uşaqları həftənin bütün günləri yox, 2-3 dəfə məktəbə göndərməklə təhlükənin qarşısını almaq mümkün olarmı?

Təhsil eksperti Kamran Əsədov Cebhe.info-ya bildirib ki, pandemiya ən çox təhsil sahəsinə ciddi təsir göstərib:

"Təhlil aparsaq görərik ki, pandemiya ən çox təhsil sahəsinə ciddi təsir göstərib. Belə ki, bu sahə fəaliyyətini davam etdirmək üçün 180 dərəcə bütün infrastrukturunu dəyişməli olub. Tədris həftəsi əvvəllər 34 idi və şagirdlər 210 gün məktəblərə gedirdilər. İndi isə bu rəqəm 68 günə qədər düşəcək ki, hesab edirəm ki, ötən tədris ilində qənaətbəxş təhsil verilməsi imkanları məhdud olduğuna görə, şagirdlərdə geriləmə tam mümkün haldır. 2-3 gün məktəbə getməklə tam bilik və bacarıqlara malik olmaq mümkün olmasa da, ən azından onlayn dərslərdən daha effektivdir".

Ekspert qeyd edib ki, 2-3 gün məktəbə demək o demək deyil ki, şagirdlər virusa yoluxacaqlar:

"Şagirdlər məktəbə gəlmək üçün ictimai nəqliyyatdan istifadə edirlər. O zaman əlbəttə ki, yoluxma halları olacaq və o şagirdlər məktəbə daxil olanda ciddi yoxlanılmasalar, potensial daşıyıcıya çevriləcəklər. Məsələ odur ki, məktəblərə dezinfeksiya işləri, şagirdlərin yoxlanılması çox ciddi aparılmalıdır".


Paylaş: