Builki qəbul imtahanında rus bölməsində oxuyan abituriyentlərin çoxunun Azərbaycan dili fənnindən kəsilməsi məsələsi sosial şəbəkələrdə geniş müzakirə olunmaqdadır. Həmin abituriyent və valideynləri qınayanlar da var, onlara haqq qazandıranlar da. Əgər, həqiqətən, belədirsə, “vay halımıza” deyə bilərik.

“Sherg.az” olaraq yayılan məlumatı dəqiqləşdirmək üçün DİM-in mətbuat xidmətinin rəisi Xanlar Xanlarzadə ilə əlaqə saxladıq. O, kəsilənlərin olduğunu təsdiqlədi:
“Hər il belə hallar olur. Lakin kəsilənlər iddia olunan qədər çox deyil. Ümumiyyətlə, qayda belədir ki, həmin fəndən minimum keçid balını, yəni 15 balı toplaya bilməyənlər avtomatik olaraq kəsilirlər”.

Təhsil eksperti Nabatəli Qulamoğlu isə sözügedən neqativ hala təsir edən əsas məqam kimi sualların məzmununu göstərib:

“Düzü, builki suallarla tanış deyiləm. Amma keçən il DİM məndən xahiş etmişdi ki, hazırlanmış sualları rus dilinə tərcümə edim. Tapşırıqlar, həqiqətən, çətin idi. Əlbəttə, rus bölməsində oxuyanlar da Azərbaycan dilini bilməlidirlər.

Amma, məncə, burada dilin kommunikativ məsələləri, yəni səlis danışmaq, oxuyub anlamaq nəzərdə tutulmalıdır. Qrammatik biliklər isə əsas götürülməyə bilər.

Odur ki, hətta kommunikativ məqamları da bilməyənlərin işlərinin qeyri-məqbulla qiymətləndirilməsi anlaşılandır. Fəqət qrammatik biliklərə malik olmadığına görə rus bölməsində oxuyan abituriyenti kəsmək, fikrimcə, düzgün deyil.

Ümumiyyətlə, rus bölməsində oxuyanlara qarşı bir “səlib yürüşü başlayıb”.

Çətin sualların da həmin “yürüş”ün inikası olduğunu düşünürəm. Sözsüz ki, hərənin bir mövqeyi var. Mənim fikrimcə, rus bölməsində oxuyanlara qarşı belə münasibət düzgün deyil. Çünki onların hər birinin valideynləri vergi ödəyiciləridir. Və Azərbaycan Respublikasında təhsil azad olduğuna görə, hər kəs istədiyi bölmədə təhsil ala bilər”.


Paylaş: