"Biz səkkiz nəfər idik. Yeddi şəhid qardaşım və mənim yarım qalmış missiyamız var. Səkkizinci olaraq mənim bu missiyanı yerinə yetirmək kimi mənəvi borcum var. Bu dəqiqə orada olub, döyüşçülərimizlə çiyin-çiyinə döyüşüb, missiyanı tamamlamaq istəyirəm".
Bunu Azvision.az-a açıqlamasında keçmiş döyüşçü və qazi Aqil Əhmədov deyib. Bildirib ki, ehtiyatda olan, köhnə döyüşçülər kimi onlar da döyüşmək istəyir:

“Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinə yenidən döyüşmək üçün müraciət etmişəm. Hərbi geyimim hazırdır. Sadəcə komanda gözləyirik. Bu gün tək mən yox, bütün qazilər yenidən döyüşməyə hazırdır. Ordumuza, əsgərlərimizə, döyüşçülərimizə ümidimiz çox böyükdür. Əldə olunan nəticələri görürük və sevincimizin həddi-hüdudu yoxdur. Bizə başqa yer lazım deyil. Bizə öz torpaqlarımız lazımdır. Çox güman ki, bizə də ehtiyac olacaq və döyüşə çağıracaqlar”.

Qeyd edək ki, 23 il əvvəl iki kəşfiyyat qrupu xüsusi tapşırıqla Qarabağa göndərilib. Qrup düşmənin arxasına keçərək tapşırığı yerinə yetirib. Birincin qrup itkisiz qayıdıb. Lakin düşmən tərəfindən ikinci qrup mühasirəyə düşüb və təslim olmalarını söyləyiblər. Təslim haqqında təklif döyüşçülərimiz tərəfindən rədd edildikdən sonra ağır döyüş başlayıb. Kəşfiyyatçılarımız düşmənin xeyli canlı qüvvəsini məhv edib. Güllələri qurtardıqda düşmənin əlinə keçməmək üçün özlərini qumbara ilə partladıblar. 8 nəfər heyətdən ibarət olan qrupun 7-üzvü şəhid olub. A.Əhmədov həmin qrupdan sağ qalan yeganə kəşfiyyatçıdır.


Paylaş: