“Bu komissiya tərxis olunmuş şəxsləri yönəltmək və insanları maarifləndirmək məqsədilə yaranıb”

Müdafiə naziri, general-polkovnik Zakir Həsənovun yeni əmrinə əsasən səfərbərlikdən tərxis edilən şəxslərlə əlaqədar müvafiq komissiya yaradılıb. Məqsəd həmin vətəndaşların qəbulunun keçirilməsi, onların müraciətlərinə vaxtında və obyektiv baxılmasını təmin etməkdir. Son günlər sosial şəbəkələrdə Vətən müharibəsində iştirak edən şəxslər tərəfindən müxtəlif məsələlərlə əlaqədar videolar paylaşılır. Əlbəttə, belə videoların yayılması düşmənlərimizin maraqlarına xidmət edir.

Bu baxımdan yaradılan yeni qurum tərxis edilən vətəndaşlarla bağlı işin təşkilini həyata keçirəcək. Ona görə də cəbhədən qayıdan şəxslər müraciətlərini sosial şəbəkələrdə video paylaşmaqla deyil, komissiyaya ünvanlamalıdırlar.

Yeni komissiyanın yaradılmasının gözəl təşəbbüs olduğunu deyən ehtiyatda olan polkovnik Şair Ramaldanov “Sherg.az”a bildirib ki, ordumuz 44 günlük Vətən müharibəsində ərazi bütövlüyümüzü bərpa etdi və qələbə qazandı. Onun sözlərinə görə, qələbəmizin əsas səbəbkarları Ali Baş Komandan və əsgərlərimizdir:

“Tərxis edilənlərlə bağlı çoxsaylı suallar və müraciətlər var. Bu sualların operativ şəkildə cavablandırılması məqsədilə komissiya yaradılıb. Vətəndaşlar müraciət edəndə məhz mütəxəssislərdən cavab almalıdırlar. Çünki Müdafiə Nazirliyinə aid olan suallara təbii ki, nazirliyin mütəxəssisləri cavab verə bilərlər. Bəzi narazılıq və şikayətlər vətəndaşların məlumatlı olmamasından irəli gəlir”.

Ş.Ramaldanov hesab edir ki, yeni komissiya çoxsaylı sualların həlli üçün effektiv olacaq:

“Komissiya vətəndaşları dinləmək, tərxis olunmuş şəxsləri yönəltmək və insanları maarifləndirmək məqsədilə yaranıb. Bu baxımdan komissiyanın yaradılması çox düzgün qərardır. Sosial şəbəkələrdə bəzi şikayətlər var.

Görünür ki, vətəndaşlar hara müraciət edəcəklərini bilmirlər. Lakin vətəndaşlar bu gündən sonra suallarına cavab tapacaqlar”.


Paylaş: