Bu gündən etibarən ölkəmizdə COVİD-19 əleyhinə peyvəndlənmə prosesi start götürüb.

Vaksinasiya ilk olaraq səhiyyə işçilərindən başlanacaq. Ancaq peyvəndlə bağlı cəmiyyətdə birmənalı fikir mövcud deyil. Xüsusilə Çin peyvəndinin keyfiyyəti ilə bağlı müzakirələr gedir.

Maraqlıdır, indiyə qədər koronavirusla bağlı fikirləri ilə daim mətbuatın gündəmində olan həkimlər Çindən gətirilən peyvəndi vurduracaqmı?

Bu barədə Cebhe.info-ya açıqlamasında ATU-nun Formokologiya fakültəsinin dosenti Aydın Əliyev bildirib ki, peyvənd olunacaq:

“Bəli, mən peyvənd etdirəcəyəm və inanıram ki, keyfiyyətli olar. Türkiyə bundan istifadə edir, Azərbaycan da buna qoşuldu. Bu, bir mübarizədir və mən də bu mübarizədə peyvənd etdirəcəyəm”.

Həkim-cərrah, tibb elmləri doktoru Adil Qeybulla da peyvənd vurduracaq:

“Əlbəttə ki, peyvəndlənmə siyahı ilə gedəcək və biz də hamımız vaksin vurduracağıq. Çünki mən həmişə demişəm ki, biz peyvəndin əleyhinə gedə bilmərik. Bu məsələ dünya üzrə ciddi nəzarətdədir və ətrafda gəzən bütün şaiyələr əsassızdır”.

ATU-nun Tədris Terapevtik Klinikasının Şüa diaqnostikası şöbəsinin müdiri, radioloq Aydın Əliyev isə mütləq vaksin vurduracağını açıqlayı: “Bu gün eşitdiyimə görə, bizdə peyvəndlənmə olunmalıdır. Yəqin ki, mütləq şəkildə iştirakçılardan biri də mən olacağam”.

Lakin həkimlərimiz arasında vaksinasiya olunmağı düşünməyənlər də var. Onlardan biri, həkim-terapevt Rasif Bağırovdur.

O, digər həmkarlarından fərqli olaraq peyvənd olunmayacağını bildirir:

“Birincisi, peyvənd onillik sınaq müddətini keçməyib, ikincisi Çindən gətirilir, üçüncüsü isə TƏBİB rəhbəri də qorxulu siqnal verib. Mən qorunmaq üçün maska taxmağa davam edəcəyəm. Çünki televiziyada da bildirirlər ki, peyvənd hələ tam qorunmaq demək deyil. Bundan əlavə, Çin vaksininin 50 faiz effekt göstərməsi barədə söz-söhbət gəzir”.


Paylaş: