Avropa İttifaqında (Aİ) xristian xaçlarının məhv edilməsi halları artıb ki, bu da «iblisin oyanışı»nın təzahürüdür. Bu barədə «Niezalezna.pl» portalına müsahibəsində polşalı keşiş, kardinal Stefan Vışinski Universitetinin dosenti Valdemar Tsislo bəyan edib.

Bir neçə gün bundan əvvəl İspaniyanın Aqilar-de-la-Frontera şəhərində ayaqyalın karmelitlər Ordeninin tarixi katolik xaçı sökülərək, zibilxanaya tullanıb. Bu mədəniyyət predmetinin məhv edilməsinin səbəbi kimi, tarixi yaddaş predmetləri haqqında qanun göstərilir. Qanuna əsasən, İspaniyada «Franko rejiminin rəmzləri» (bu xaçlar frankoçular tərəfindən yad olunan və vətəndaş müharibəsində diktatorun tərəfində döyüşüb həlak olanların anım rəmzi qismində istifadə olunub) sökülür.

Ancaq İspaniyanın dindarlar cəmiyyəti bu qərarın əleyhinə çıxış edib və etirazını belə əsaslandırmağa çalışıb ki, xaç tarixi baxımdan San-Xose monastrının bədii kompleksinə aiddir və heç vəchlə frankizmin rəmzi sayıla bilməz. İspaniya Xristian hüquqşünaslar assosiasiyasının fikrincə, Aqilar-de-la-Fronteranın meri Karmen Floresin (partiya mənsubiyətinə görə, solçu) qərarı xristianlara yönəlik diskriminasiya və düşmənçilik elementidir. Həm də məlum olub ki, Seviliyanın yaxınlığındakı Penyaflor bələdiyyəsinin hakimiyyəti daha bir xaçı sökülməyə hazırlayır.

Polşalı keşiş Valdemar Tsislonun fikrincə, baş verənlər - «bir növ, İsa qarşısında Avropanın utancıdır».

«Bizim qardaşlarımız Suriyada və ya İraqda xaç uğrunda ölürlər, biz isə xaç gəzdirməkdən utanırıq. Bu, bir növ, xaç qarşısında, İsa qarşısında Avropanın utancıdır. Avropada belə tendensiya var, bir çox ölkələrdə və təəssüf ki, həm də Polşada: biz, xaçı və xristianlığı yer üzündən silirik» - polşalı keşiş bildirib.

Bu məqamda hörmətli oxucuların diqqətini Polşalı keşişin Suriya, İraq… müharibələrinə yönəlik söylədiyi fikirə yönəltmək istəyirəm. Hamımız bilirik ki, İraqda, Suriyada… xristian dövlətlərin yaratmış olduqları koalisiya xaç uğrunda yox, sərvət və qarət uğrunda bu ölkələri xarabazara çevirib, xalqlarını isə qaçqına döndərib. Təsadüfi deyil ki, bugünlərdə Amerka Birləşmiş Ştatlarının (ABŞ) yeni seçilmiş prezidenti Cozef Baydenin inauqurasiyasının getdiyi bir vaxtda Suriyanın BMT-dəki daimi nümayəndəsi «təzə bəy»ə xitabla deyib: «Ordunu ölkəmdən çıxart və Suriyanın talan edilməsini dayandır!». Polşalı keşiş isə özü də bilmədən «ifrata vararaq», koalisiya dövlətlərinin apardığı bu soyğunçu müharibələrin gerçək məqsədini faş etmiş olub.

Deməli, xristian dünyasının müsəlmanlara qarşı «xaç yürüşü» hələ də səngiməyib və göründüyü kimi, bu müharibələrin mənəvi ilhamvericisi əvvəlki kimi, yenə də kilsədir.


Paylaş: