Milli Məclisin ötən gün baş tutan iclasında millət vəkili Fazil Mustafa Nazirlər Kabineti yanında Operativ Qərargahı tənqid edib. O, idman zallarının açılması və toyların keçirilməsi ilə bağlı qərarların olmamasından şikayətlənib.

Deputat qeyd edib ki, idman zalları açılmalı, toy mərasimləri isə tənzimləmələrlə keçirilməlidir.“Biz burada məsələ qaldırırıq, heç kim reaksiya vermir, maraqlanmır. Bu nə deməkdir? Niyə maraqlanmırlar ki, xalq necə yaşayır? Bu gün ölkədə ciddi demoqrafik problemlər də mövcuddur”, - deyə F.Mustafa söyləyib.

Doğrudan da, nəzərə almaq lazımdır ki, bu və ya digər səbəbdən gənclərin ailə həyatı qura bilməməsi gələcəkdə ciddi demoqrafik böhrana səbəb ola bilər. Deməli, hansı yollasa həm də gələcəyimizin qayğısına qalmalıyıq.

Sosioloq Əhməd Qəşəmoğlu həmin yolun nə olduğunu “Sherg.az”a izah etdi:

“Həmişə demişəm ki, son 15-20 ildə keçirilən toylar çox böyük sosial bəladır. Nə yaxşı ki, canımız qurtardı. Bəzən bir adama eyni ayda 4-5 dəvətnama göndərilməsi, şadlıq saraylarındakı masalar 50 növ təamın düzülməsi, iştirakçıların bir-birilərinin “borcundan çıxması” və s. gülüncdür.

Bu, eybəcərlikdir. Əvvəllərsə belə deyildi.

Toylar adətən açıq havada, həyət evlərində olmalıdır. Yenə belə olmalıdır. Birincisi, yeməyə yox, əyləncəyə fikir vermək lazımdır. Belə olan halda həm də “pul salmaq” adəti tədricən unudulacaq.

İkinci bir tərəfdən isə məclisdə, az qala, hamının iştirak etməyinə rəğmən, sıxlıq yaranmayacaq. İnsanlar istədikləri vaxt gələcək, istədikləri vaxt gedəcək.

Yəni hamının- həm valideynlərin, həm cütlüklərin, həm qonaqların, həm də musiqiçilərin maraqları təmin olunacaq. Mənim təklif etdiyim model budur. Toyların tamamailə unudulmasının əleyhinəyəm.

Kim istəyər ki, sadəcə nikahla kifayətlənsin? Əlbəttə, özəl gününün yaddaqalan olması hər kəsin arzusudur. Təklif etdiyim modellə işləsək, toyların maraqlı keçirilməsi ilə yanaşı, eyni zamanda virusa yoluxmamağa, özümüzü qorumağa nail olacağıq”.


Paylaş: