44 günlük Vətən müharibəsində qəhrəmancasına şəhid olan Rüfət Məmmədlinin son arzusu yerinə yetirilib.
Şəhidin doğulub boya-başa çatdığı Ağstafa rayonunun Saloğlu qəsəbəsində xatirəsi əbədiləşdirilib.
Belə ki, bu gün Rüfət Məmmədlinin istəyi ilə qəsəbə sakinləri tərəfindən inşa edilən “Şəhidlər bulağı” istifadəyə verilib. Tədbirdə rayon hüquq-mühafizə orqanlarının, idarə, müəssisə və təşkilatların rəhbərləri, şəhidin ailə üzvləri, yaxınları, qəsəbə sakinləri və rayon ictimaiyyət nümayəndələri iştirak edib.
Mərasimdə çıxış edənlər Birinci və İkinci Qarabağ müharibəsində şəhid olan qəhrəmanlarımızın, gizir Rüfət Məmmədlinin şücaəti və keçdiyi döyüş yolundan danışıblar. Daha sonra şəhidlərin ruhuna dualar oxunub, əziz xatirələri böyük ehtiramla yad edilib.
Qeyd edək ki, 89 ermənini məhv edən Rüfət Məmmədli yaralı olan zaman xalası oğluna mesaj yazaraq son arzusunu çatdırmışdı. O, “şəhid olsam kəndin girəcəyində adıma bir bulaq düzəldərsiz, amma suyu daim gəlsin” qeyd etmişdi.
Xatırladaq ki, Məmmədli Rüfət Vidadi oğlu 1993-cü il noyabrın 23-də Ağstafa rayonunun Saloğlu qəsəbəsində dünyaya gəlib. 2012-2013-cü illərdə N saylı hərbi hissədə hərbi xidmətdə olub. Kəşfiyyatçı snayper olan Rüfət Məmmədli 2016-cı ilin Aprel döyüşləri və 2020-ci ilin iyun ayında Tovuz döyüşlərində də iştirak edib.
Sentyabrın 27-də İkinci Qarabağ müharibəsi başlayan zaman isə o, könüllü olaraq Xüsusi Təyinatlı Qüvvələrə yazılıb. Qorxmaz və igid döyüşçü olan Məmmədli bir neçə rayonumuzun işğaldan azad olunması uğurunda gedən döyüşlərdə qəhrəmalıqlar göstərib. Şuşanın azadlığı uğurunda gedən döyüşdə - noyabrın 8-də şəhidlik zirvəsinə ucalıb. Noyabrın 12-də Saloğlu qəsəbə qəbiristanlığında dəfn olunub.
Rüfət Məmmədlinin 2 azyaşlı övladı var.
Döyüş yoldaşları tərəfindən igidliyinə, qəhrəmanlığına görə Rüfətə “Əjdaha” ləqəbi verilib.
Prezident İlham Əliyevin imzaladığı müvafiq sərəncamlara əsasən, Rüfət Məmmədli ölümündən sonra “Vətən uğrunda”, “Döyüşdə fərqlənməyə görə”, “Kəlbəcərin azad olunmasına görə” və “Şuşanın azad olunmasına görə” medalları ilə təltif edilib.







Paylaş: