Qalstuksuz, ayaqqabısı palçıqlı, qucağında quzu tutan, xalqa Fransanın Sarbonna universitetində magistr təhsili almış, Qərb dünyagörüşünə malik, islahatçı, gənc kadr kimi təqdim olunan Kənd Təsərrüfatı naziri İnam Kərimov haqda bütün bu xarakteristika, mədhiyyələr demə, sabun köpüyü imiş.
Əslində bu gənc nazirin içində qarnıyekə, boynuyoğun tipik korrupsioner məmur, köhnə nomenklaturanın yolu ilə gedən çinovnik mahiyyəti gizlənibmiş.
KTN rəhbərliyinə gəldiyi ilk günlərdə pozitiv bir təəssürat doğuran, aqrar sektorda innovativ idarəçilik quracağı gözlənən, İsmət Abbasov və Heydər Əsədov dövründən qalan problemlərin aradan qaldıracağı proqnozlaşdırılan İ.Kərimov gənc və islahatçı nazir reputasiyasını alt-üst etdi.
Anaxeber.info-nun verdiyi məlumata görə, bu yaxınlarda Ümid Partiyasının sədri İqbal Ağazadənin səsləndirdiyi tənqid və ittihamlar da aqrar sahədə hansı biabırçılıqların davam etdiyini ortaya qoydu.
O, Kənd Təsərrüfatı Nazirliyində hansı maxinasiyalar olduğunu açıqlayıb. Partiya lideri bildirib ki, damazlıq heyvan, kənd təsərrüfatı texnikası və gübrənin qiymətini şişirdərək pul mənimsənilir.
İ.Ağazadənin sözlərinə görə, Gəncədə istehsal olunan Belarus traktorları sahibkarlara 82 500 manata verilir, yəni 49 min dollara: “Həmin məbləğin 40 faizini dövlət, qalanını isə fermer verir.
Traktorun bazar qiyməti 29 min dollardır. Gübrənin bir kisəsi bazarda 18-20 manatdır, amma bunlar 50 manatdan sənədləşdirirlər. Kimlərin monopoliyasındadır?”
Partiya lideri bildirib ki, KTN böyük rüşvət və korrupsiyanın içindədir, Baş prokuror Kamran Əliyevə müraciət ediləcək.
İ.Ağazadə siyasi çıxışları ilə seçilən, hakimiyyətin idarəçiliyini sistemli tənqid edən, fərd-fərd deyil, bütövlükdə idarəetmə modelini tənqid atəşinə tutan partiya sədridir.
Yəni, o, nadir hallarda ayrı-ayrı qurumları, nazirlikləri ayrıca tənqid edir. Amma görün KTN-də vəziyyət hansı həddə çatıb ki, İ.Ağazadə dilə gəlib.
Onun dediklərindən aydın olur ki, İ.Kərimovun Sarbonnada təhsil alması belə idarəçilikdə hər hansı müsbət nəticəyə gətirib çıxarmayıb. Sadəcə, gedib qalstuklu korrupsioner, yerinə gəlib xarici təhsillisi...Bu, kosmetik dəyişiklikdən başqa bir mahiyyət daşımır.
Çünki İnam Kərimov nə adına, nə imicinə yaraşmayan işlərlə məşğul olmaqda ittiham edilir. Onun damazlıq heyvan, kənd təsərrüfatı texnikası və gübrənin qiymətini şişirdərək yeyintilərə yol verməsi başqalarından fərqləndirmir.
Ümumiyyətlə, İ.Kərimovun nazir təyinatından sonra aqrar sahədə əsaslı dəyişikliklər nəzərə çarpmır. Nə fermerlərin problemləri həllini tapıb, nə subsidiyaların verilməsində irəliləyiş var, nə bazarda məhsuldarlıq, bolluq müşahidə olunur, nə də ucuzlaşma...
Hesablama Palatasının 2020-ci ildəki fəaliyyətinə dair hesabatından aydın olur ki, KTN strukturlarında xüsusilə dövlət vəsaitlərinin xərclənməsi sahəsində mühüm problemlər qalmaqdadır.
Anaxeber.info yazır ki, son aylarda gübrələrin, biohumus və pestisidlərin alınmasında fermerlərin böyük problemlərlə üzləşdiyi bildirilir. Fermerlər bu məhsulları istədikləri, daha doğrusu, onlara sərf edən satıcılardan deyil, KTN-in siyahısında olan satıcılardan almağa məcbur edilirlər.
Gübrələrin, biohumus və pestisidləri fermerlər dövlətin onlara verdiyi aqrar subsidiyanın nağdlaşdırılması mümkün olmayan 75 faizi ilə almalıdılar.
Bunun üçün KTN-in siyahısında olan satış mağazalarında xüsusi aparatlar qoyulub, subsidiya kartları yalnız həmin aparatlar vasitəsilə oxunur.
Nəticədə fermerlər bu məhsulları bir çox hallarda daha ucuz satandan deyil, nazirliyin tələb etdiyi bahalı mağazalardan almalı olurlar.
KTN sistemindəki ciddi problemlər sosial şəbəkələrdə də ciddi müzakirələrə səbəb olmaqdadır. İqtisadçı-alim Qubad İbadoğlunun sosial hesabından paylaşdığı bir rəy diqqəti cəlb edir.
O, Şəkinin Bideyz kəndində yerləşən qurumuş çay yatağında fındıq bağının salınması faktına diqqət çəkib: “Kənd təsərrüfatı naziri İnam Kərimov bu daşlıqda salınmış intensiv fındıq bağının açılışını edib.
Şəkildən də göründüyü kimi, burada torpaq deyilən bir şey yoxdur, yalnız irili-xırdalı daşlardır. Şəkildəki çay yatağında bir yox, min damcılı suvarma sistemi qur, faydası olmaz, orda olsa-olsa kol-kos bitər.
Bəs, o zaman belə yerdə bağ salmağın hansı üstünlükləri var? Üstünlüklərini yox, ancaq bu bağı salan məmurların dövlət büdcəsindən nə qədər əvəzsiz subsidiya alacağını deyə bilərik.
İ.Kərimovun komandası, kadr təyinatları da Ramiz Mehdiyevsayağı səciyyə daşıyır. Özünə yaxın adamları yüksək vəzifələrə daşıyan nazirin Fransada gördükləri dünyagörüşünə təsir etməyib. Kənd Təsərrüfatı Nazirliyinin Bitkiçiliyin təşkili və monitorinqi şöbəsinin müdiri Rəfail Quliyevin nazirliyin aparat rəhbəri vəzifəsinə təyinatını götürək.
Əslən Biləsuvardan olan yeni aparat rəhbəri nazir İnam Kərimovun həyat yoldaşının qohumudur. Başqa, izahata ehtiyac varmı?
O, 2016-2018-ci illərdə Biləsuvarda Kənd Təsərrüfatı İdarəsinin rəisi olub. İ..Kərimov 21 aprel 2018-ci ildə KTN rəhbəri təyin olunandan cəmi 4 ay sonra bu qohumunu da rayondan birbaşa KTN-nin aparatına - Bitkiçiliyin təşkili və monitorinqi şöbəsinin müdiri vəzifəsinə gətirib.
Eyni zamanda ASAN Xidmətdə rəhbər olduğu dönəmdə özünə yaxın kadrları KTN-ə gətirib. Bununla fermer necə ağ günə çıxsın? Bu idarəçiliklə aqrar sektorda biz fərqli nə görə bilərik?
Anaxeber.info


Paylaş: