Şəhid ailələrinin və müharibə əlillərinin mənzil təminatı dövlətin sosial siyasətində prioritet təşkil edir. Prezindet İlham Əliyevin sərəncamı ilə 2025-ci ilə qədər bu kateqoriyadan olan bir vətəndaş mənzilsiz qalmamalıdır. Dövlət başçısı ötən ilin iyun ayında etdiyi çıxışında bildirib ki, şəhid ailələrinin, müharibə əlillərinin problemləri daim diqqət mərkəzindədir və son illər ərzində bu istiqamətdə çox böyük işlər görülüb.

"Təkcə onu demək kifayətdir ki, 9 mindən çox şəhid ailəsi, müharibə əlili mənzillərlə təmin edilib və 7 minə yaxın avtomobil verilib. Hesab edirəm ki, biz bu il də bu sahədə rekord göstəriciyə nail olacağıq, buna şübhə yoxdur,”- deyə Prezident vurğulayıb.

Əmək və əhalinin sosial müdafiəsi naziri Sahil Babayev isə bildirib ki, 2021-2025-ci illərdə şəhid ailələrinə və Qarabağ müharibəsi əlillərinə 11 min mənzil və fərdi ev veriləcək.

Onun sözlərinə görə, həmin kateqoriyadan olan həm 2014-2019-cu illərdə qeydiyyata alınmış şəxslər, həm də 2020-ci ildə hərbi əməliyyatlarda, o cümlədən Vətən müharibəsində şəhid olanların ailələri və müharibə əlilləri yaxın beş ildə mənzil və fərdi evlə təmin olunacaq: “2021-ci ildə 3 minədək mənzil və fərdi ev verilməklə, bu il mənzil və fərdi evlə təminat proqramı 2018-ci ilə nisbətən 5 dəfəyə yaxın genişlənəcək. Prezident İlham Əliyevin tapşırığı ilə keçmiş köçkünlər üçün tikilmiş mənzillər də şəhid ailələrinə və müharibə əlillərinə təqdim edilir. Ümumilikdə isə indiyədək 9 430 mənzil və fərdi ev verilib”.

Dörd il əvvəl Azərbaycanda güzəştli mənzil almaq hüquq olan vətəndaşların kateqoriyası genişləndirilib. Belə ki, Prezident İlham Əliyevin 3 iyul 2017-ci il və 21 iyul 2017-ci il tarixli Fərmanları ilə güzəştlə mənzil əldə etmək hüququ olan vətəndaşların kateqoriyalarına əlavə və dəyişiklik edilib. Güzəştlə mənzil almaq hüququna malik şəxslər aşağıdakılardır:

-Gənc ailənin üzvü olan şəxslər;

-Şəhid ailəsinin üzvü (əri/arvadı, övladları);

-Milli Qəhrəman (özü, əri/arvadı, övladları);

-Məcburi köçkün və ya ona bərabər tutulan şəxs;

-Ən azı 3 il dövlət qulluğunda qulluq edən, o cümlədən dövlət qulluğunun xüsusi növündə xidmət keçən şəxs;

-Ən azı 5 il dövlət ümumtəhsil məktəbində müəllim işləyən şəxs;

-Fəlsəfə doktoru elmi dərəcəsi olan şəxs;

-İdman sahəsində xüsusi xidmətləri olan şəxs (fəxri bədən tərbiyəsi və idman xadimi, ölkə miqyaslı yarışların qalibi (I yer), beynəlxalq miqyaslı yarışların mükafatçısı (I, II və ya III yer);

-Ailə vəziyyətindən və yaşından asılı olmayaraq digər şəxslər;

-Elmlər doktoru elmi dərəcəsi olan şəxs;

-Ən azı 15 il dövlət qulluğunda qulluq edən, o cümlədən dövlət qulluğunun xüsusi növündə xidmət keçən şəxs;

-Ən azı 3 il hərbi xidmətdə olan (müddətli həqiqi hərbi xidmətdə olan hərbi qulluqçulardan başqa), həmçinin ehtiyata və istefaya buraxılmış Azərbaycan Respublikasının hərbi qulluqçuları;

-Ən azı 3 il daxili işlər orqanlarında xidmət keçən xüsusi rütbəsi olan şəxs;

-Ən azı 3 il elmi vəzifədə işləyən elmi işçilər.

Qeyd edək ki, müxtəlif dövlət qurumları öz hesabına və ya büdcə vəsaiti ilə öz əməkdaşlarına mənzillər tikib verir. Bu sırada Müdafiə Nazirliyi, Dövlət Sərhəd Xidməti, Daxili İşlər Nazirliyi, SOCAR, Azərbaycan Milli Elmlər Akademiyasının və s. qurumların adlarını çəkmək olar.

Amma təqdim olunan mənzillər güzəştli kateqoriyada olan vətəndaşların hamsını əhatə etmir. Çünki verilən sayı az, ona ehtiyacı və almaq hüququ lan şəxslərin sayı isə hədsiz çoxdur.

Bu məsələnin həlli “Azərbaycan 2020: gələcəyə baxış” İnkişaf Konsepsiyasında da öz əksini tapıb. Sözügedən sənədə uyğun olaraq, Prezident İlham Əliyev 11 aprel 2016-cı ildə Prezident yanında Mənzil İnşaatı Dövlət Agentliyi yaradılması barədə sərəncam verib. Agentliyin yaradılmasının əsas məqsəd vətəndaşlarının yaşayış sahələrinə olan ehtiyacını ödəmək, onların mənzil-məişət şəraitini yaxşılaşdırmaq, müasir memarlıq üslubunda ekoloji və enerji səmərəliliyi tələblərinə cavab verən çoxmənzilli binaların tikilməsini təmin etmək, habelə bununla bağlı şəhərsalma və tikinti sahələrində dövlət idarəetməsini təkmilləşdirməkdir. Bununla yanaşı vətəndaşlarının güzəştlə mənzillər əldə etmələrinə şərait yaratmaq, çoxmənzilli yaşayış binalarının tikintisi üçün ayrılan maliyyə vəsaitlərindən səmərəli istifadə edilməsini təşkil və təmin etmək məqsədilə Mənzil İnşaatı Dövlət Agentliyinin tabeliyində “MİDA” Məhdud Məsuliyyətli Cəmiyyəti yaradılıb.

Bu günədək Agentlik Yasamal Yaşayış Kompleksini, Hövsan Yaşayış Kompleksini, Xarici dairəvi avtomobil yolunun kənarında yeni yaşayış kompleksi isitifadəyə verib, eyni zamanda Sumqayıtda güzəştli mənzillər tikərək satıb və ya həmin layihələrin icrası davam etdirilir.

Agentliyin açıqlamasına görə, yalnız "Güzəştli mənzil" sistemində elektron kabinetə sahib olmuş vətəndaşların mənzil almaq hüququ var.

Agentliyin satışa çıxardığı mənzillərin qiyməti 1 otaqlı - 30 min manatdan, 2 otaqlı - 47 min manatdan, 3 otaqlı - 65 min altı yüz manatdan başlayır.

Mənzilləri öz vəsaiti hesabına, İpoteka və Kredit Zəmanət Fondunun vəsaiti hesabına və digər kredit təşkilatlarından maliyyə cəlb etməklə əldə etmək olar. Mənzil ipoteka krediti ilə alındığı zaman, 10 faiz minimal ödəniş tələb olunur. Kredit illik 4 faiz dərəcəsi olmaqla 3-30 il müddətinə verilir.

Məlumdur ki, güzəştli mənzil almaq hüququ olan xeyli vətəndaşın bu şərtlərələ ev almaq imkanı yoxdur. Onlar yerli icra hakimiyyətlərinə müraciət edərək, mənzil uçotuna dayanıblar.

Apardığımız araşdırma zamanı məlum oldu ki, hər rayonda minlərlə vətəndaş növbəyə dayanaraq mənzil alacağını gözləyir. İcra hakimiyyətlərin saytlarında onların siyahısı belə təsnif edilib:

1. İcra Hakimiyyəti tərəfindən yaşayış yeri üzrə 21 may 2019-cu il tarixinə qədər ümumi və güzəştli əsaslarla mənzil növbəsinə götürülmüş vətəndaşların siyahısı;

2. İcra Hakimiyyətində yaşayış üzrə ümumi güzəştli əsaslarla mənzil növbəsinə dayanan vətəndaşların ümumi siyahısı;
3. İcra Hakimiyyətində yaşayış yeri üzrə güzəştli əsaslarla mənzil növbəsinə dayanan şəhid ailələrinin ümumi siyahısı;
4. İcra Hakimiyyətində güzəştli əsaslarla mənzil növbəsinə dayanmış Qarabağ müharibəsi əlillərinin ümumi siyahısı;
5. İcra Hakimiyyətində yaşayış yeri üzrə güzəştli əsaslarla mənzil növbəsinə dayanmış Böyük Vətən Müharibəsinin iştirakçılarının ümumi siyahısı;
6. İcra Hakimiyyətində yaşayış yeri üzrə güzəştli əsaslarla mənzil növbəsinə dayanmış Qarabağ müharibəsi veteranlarının ümumi siyahısı;
7. İcra Hakimiyyətində yaşayış yeri üzrə güzəştli əsaslarla mənzil növbəsinə dayanmış "20 yanvar" faciəsi əlillərinin siyahısı;
8. İcra Hakimiyyətində yaşayış yeri üzrə güzəştli əsaslarla mənzil növbəsinə dayanmış ÇAES əlillərinin ümumi siyahısı;
9. İcra Hakimiyyətində yaşayış yeri üzrə güzəştli əsaslarla mənzil növbəsinə dayanmış hərbi xidmət vəzifəsini yerinə yetirməklə əlil olmuş ehtiyyatda olan zabitlərin siyahısı;
10. İcra Hakimiyyətində mənzil növbəsində uçotda olan Əfqanıstan müharibəsi əlillərinin və iştirakçılarının siyahısı;
11. İcra Hakimiyyətində gözdən əlil kimi güzəştli əsaslarla mənzil növbəsində uçotda olan vətəndaşların siyahısı;
12.Rayonda 20 yanvar hadisələri ilə əlaqədar şəhid olmuş şəxlərin mənzil növbəsində dayanmış ailə üzvlərinin siyahısı.

Bu siyahıda olan şəhid ailələrinin, Qarabağ əlillərinin, 20 yanvar şəhidlərinin və əlil olmuş şəxslərin adları icra hakimiyyətləri tərəfindən Əmək və Əhalinin Sosial Müdafiəsi Nazirliyinə göndərilir. Nazirlik də onları təqdim olunan tarixə uyğun olaraq növbəli siyahıya götürür və mənzillə təmin edir. 2025-ci ilə qədər bu şəxslərin hamsına mənzil veriləcək.

Bəs, güzəştli mənzil hüququ olan qalan vətəndaşlar mənzillə necə təmin olunacaqlar?

Binəqədi Rayon İcra Hakimiyyətindən "AzPolitika.info"-ya bildirilib ki, qurumun mənzil fondunda ancaq köhnə tikilmiş binalar var, onların hamsı vətəndaşların mülkiyyətindədir. İcra hakimiyyətinin nə mənzil fondu, nə də onu tikmək üçün vəsaiti yoxdur. Bu məsələnin həlli üçün yeni dövlət pqroqramının qəbul olunmasına ehtiyac var.

Əmək və Əhalinin Sosial Müdafiəsi Nazirliyindən isə bildirilidi ki, həmin güzəştli kateqoriyanın mənzillə təminatı məsələsi onların səlahiyyətində deyil. Nazirlik ancaq müharibə əlilləri və şəhid ailələrinin mənzil problemi ilə məşğul olur.


Paylaş: