Bir həftə ərzində Rusiya və Qərb ölkələri qarşılıqlı şəkildə 140 diplomatı qovublar.

Bu məlumatı “Finanz.ru” yayıb. Məlumata görə, bununla da Marqaret Tetçer və Ronald Reyqanın dövründə qeydə alınan “casus müharibələri”nin rekordu qırılmış olub.

Rusiya ilə yaşanan diplomat böhranda tərəf kimi ABŞ, Polşa, Çexiya, Latviya, Litva, Estoniya və Slovakiya çıxış edib. Ən böyük gərginlik isə Rusiya ilə Çexiya arasında yaşanıb. İndiyə qədər Çexiya öz ərazisindən 53 diplomatı və Rusiya səfirliyinin 46 administrativ texniki işçisini “arzuolunmaz şəxs” elan edib. Moskva isə Çexiyanın 40 diplomatını ölkədən çıxarıb və daha 91 şəxsin səfirlikdən çıxarılmasını tələb edib.

Sayta açıqlama verən rusiyalı politoloq Fyodr Lukyanov hazırda Rusiya ilə Qərb arasındakı situasiyanın dibə çatdığını deyib:

“Struktur baxımından bu, əvvəlki soyuq müharibəyə bənzəmir, amma mental və atmosfer baxımından ondan da pisdir. Əgər əvvəllər prezidentlərin birbaşa danışıqları ümidlə qəbul edilirdisə, indi heç kim buna əmin ola bilmir. Putinlə Baydenin görüşü münasibətlərin yaxşılaşmasına yol aça bilməz, əksinə, mübahisə və fikir ayrılığının güclənməsi ilə nəticələnəcək və bundan sonra münasibətlər tam dalana dirənəcək”.


Paylaş: