“Azərişıq” ASC Bakıda vətəndaşa məxsus olan əraziyə qanunsuz olaraq digər sakinlərin elektrik sayğaclarını quraşdırıb.

Bu barədə  sözügedən ərazinin sahibi Vasilçenko Natalya Vasilyevnanın yaxını Diana Koks məlumat verib.

O bildirib ki, söhbət paytaxtın Xəzər rayonu, Şüvəlan qəsəbəsində 779p saylı bağ sahəsindən gedir:

“V.N.Vasilyevna sözügedən ünvanda yerləşən daşınmaz əmlakı alqı-satqı yolu ilə əldə edib. 2017-ci ildə “Hüquqların Dövlət qeydiyyatı haqqında daşınmaz əmlakın Dövlət reyestrindən çıxarış” əldə edilib. Müvafiq torpaq sahəsi tam şəkildə xüsusi mülkiyyətdir və 2015-ci ildən tam şəkildə daş divar ilə hasarlanıb.






Lakin, V.N.Vasilyevanın xəbəri olmadan sözügedən ünvanda yerləşən torpaq sahəsinin daş divar hasarlarının içəri tərəfinə (sənədli mülkiyyət torpağında) icazəsiz olaraq, qeyri-qanuni şəkildə tanımadığımız şəxslər tərəfindən elektrik naqilləri, elektrik şitləri, 11 ədəd elektrik sayğac quraşdırılıb. Belə ki, həyətdə qeyri-qanuni və icazəsiz şəkildə quraşdırılan sayğaclar, müxtəlif naqillərin, şitlərin yaratdığı təhlükə səbəbindən öz mülkiyyət hüquqlarımızı istifadə edə bilmirik”.

D.Koks qeyd edib ki, mövcud problemlə bağlı Xəzər Rayon Enerji Təchizatı və Satışı İdarəsinə müraciət etsələr də, onlar idarəyə buraxılmayıb:

“Bizi idarəyə buraxmadan “ASAN Kommunal” Mərkəzinə müraciət etməyimiz bildirildi. 2 saylı “ASAN Kommunal” Mərkəzindən isə müraciətimizə cavab olaraq bildirildi ki, biz özümüz, şəxsən gedib qonşulardan icazə alıb öz həyətimizdə olan bizə aid olmayan sayğacları və digər elektrik naqillərini sökə bilərik”.

“Düşünürəm ki, “Azərişıq” ASC, Xəzər Rayon Enerji Təchizatı və Satışı İdarəsi, “ASAN Kommunal” tərəfindən bizim konstitusiya ilə tənzimlənən hüquqlarımız, mülkiyyət hüququmuz kobud şəkildə pozulur. Müvafiq naqillər 3 iş günü ərzində sökülməsi və mülkiyyət hüquqlarının bərpasını tələb edirik”, - deyə şikayətdə qeyd edilir.

“Azərişıq” ASC-nin mətbuat xidmətinin rəhbəri Vaqif Aydınoğlu məsələ ilə bağlı Oxu.Az-ın sorğusuna cavab olaraq bildirib ki, sözügedən ərazidə sayğaclar yerləşdirildiyi zaman ora boş ərazi olub:

“Boş ərazi olduğu kimi həmin sayğaclar orada quraşdirilib. Xanimin müraciətindən sonra əraziyə baxış keçirilib və hazırda sayğacların köçürülməsi ilə məşğuluq”.


Paylaş: