Xəbər verildiyi kimi, dünən Daxili İşlər Nazirliyi özünü 12-ci İmam Mehdi kimi təqdim edib insanlara qarşı külli-miqdarda dələduzluq edən Babayev Aqil Zalış oğlunun həbs edilməsi ilə bağlı məlumat yayıb. Rəsmi açıqlamada onun 2000-2021-ci illər ərzində dələduzluq, yəni etibardan sui-istifadə etmə və ya aldatma yolu ilə 50-yə yaxın şəxsin külli miqdarda pullarını ələ keçirdiyi bildirilir.

Qeyd edək ki, Aqil Babayevə elan olunan ittihamlar sosial şəbəkələrdə geniş müzakirələrə səbəb olub. Müzakirələrdə A. Babayevin “Şaurma N1” restoranlar şəbəkəsinin rəhbəri Natiq Sadıqovun şəriki olduğu, biznesmenin özünün də şəriki tərəfindən dələduzluğa məruz qaldığı iddia edilib.

Aktualinfo.org xatırladır ki, sahibkarlıq fəaliyyəti ilə məşğul olan Aqil Babayevin ona qarşı soyğunçuluq törətmiş bir qrup şəxsin özbaşınalıq əməllərinin qarşısının alınması ilə bağlı Prezident İlham Əliyevə müraciəti hələ iyun ayında yayılmışdı. 05.08.2021-ci il tarixdə Aktualinfo.org saytında yayılmış ” “Şaurma 1″ restoranlarının sahibi Natiq Sadıqov şərikinin 9 milyon manatını ələ keçirib – Artıq ölkəni tərk etdiyi bildirilir” başlıqlı məqalədə onun üzləşdiyi problemlər öz əksini tapmışdı.

Məqalə yayıldıqdan sonra 14 saylı Vəkil Bürosunun vəkili, özünü Natıq Sadıqovun vəkili və etibarnamə əsasında nümayəndəsi kimi təqdim edən Aqil Nuriyevin 19.08.2021-ci il tarixdə redaksiyanın elektron poçtuna məktub yazıb. Məktubda Natiq Sadıqovun sahibkarlıq fəaliyyəti ilə məşğul olduğundan məqalədə göstərilənlərin onun nüfuzuna xələl gətirdiyi bildirilir. Həmçinin qeyd olunur ki, Natiq Sadıqov Azərbaycanı tərk etməyib, məqalədə rəsmi orqanlara istinad olunmayıb. Redaksiyadan yayılanların həqiqətə uyğun olmadığı barədə təkzib vermək, məqaləni saytdan silmək tələb olunur və əks halda işgüzar nüfüzün müdafiəsinə görə məhkəməyə müraciət edəcəkləri bildirilir.

Vəkil Aqil Nuriyevlə telefon danışığımız zamanı əks tərəf olaraq onların da məsələyə münasibətini dərc etməyə hazır olduğumuzu bildirdik. Lakin vəkil bununla razılaşmayaraq israrla məqalənin saytdan silinməsini və yayılanların həqiqətə uyğun olmadığı barədə təkzib verilməsini tələb etdi. Vəkil Aqil Nuriyev “Şaurma 1” restoranlarının sahibinin Natiq Sadıqov deyil, başqa adam olduğunu da bildirdi. Vəkil həmçinin, Aqil Babayevin dələduzluqla avqust ayının 2-dən həbs olunduğunu bizə xatırlatdı.

Natiq Sadıqovun nümayəndəsinə əvvəlcədən xatırlatmaq istərdik ki, məqalədə söhbət Aqil Babayevin nə üçün həbs olunmasından söhbət getmir. Məqalədə Aqil Babayevin soyğunçuluğa məruz qalmasından, Natıq Sadıqovun da aralarında olduğu bir qrup dəstə ilə mənzilinə basqın etmiş şəxslərin cinayət məsuliyyətinə cəlb edilməməsindən, bununla bağlı hüquq-mühafizə orqanlarına olunan müraciətlərə baxılmamasından söhbət gedir və ölkə başçısından kömək istənilir. Bütün bunlar isə hələ iyun ayında baş versə də tərəfimizdən avqust ayında ictimailəşdirilib. Elə Aqil Babayevn barəsində həbs qətimkan tədbiri də Nərimanov rayon Məhkəməsinin qərarı ilə 04.08.2021-ci il tarixində seçilib. Hesab edirik ki, Daxili İşlər Nazirliyi öncə Aqil Babayevin soyğunçuluğa məruz qalması ilə bağlı etdiyi müraciətləri araşdırmalı, hüquqi qiymət verməli, daha sonra onun barəsində olunan “şikayətlərə” baxmalı idi.

Digər tərəfdən isə Natiq Sadiqov “Şaurma 1” restoranlarının sahibi deyilsə, onun hansı işgüzar nüfuzundan söhbət gedə bilər. Natiq Sadıqovun vəkilindən fərqli olaraq Aqil Babayevin vəkili redaksiyamıza açıqlamasında müvəkkilinin “ŞaurmaN1” restoranlar şəbəkəsinin sahibi Natiq Sadıqovla şərik olduğunu bildirdi. Hətta Aqili öz müəssisəsinə şərikliyə Natiq Sadıqovun dəvət etdiyini qeyd etdi.

Daxili İşlər Nazirliyinin yaydığı məlumatda zərəçəkən qismində adıçəkilə şəxslərə gəlincə. Aqil Babayevin qardaşı Sərdar Babayev mətbuata verdiyi açıqlamasında bildirir ki, qardaşının şərikinə və hazırda zərərçəkmiş kimi göstərilən şəxslərə borcu yoxdur: “Natiq Sadıqovdan tutmuş ən sonuncu şəxsə qədər hər biri Aqil Babayevə borcludur. Yaşadıqları evi də Aqil alıb onlara verib. Elə niyyətləri də odur ki, Aqildən oğurladıqları ört-basdır olunsun”.

Qayıdaq Daxili İşlər Nazirliyinin Aqil Babayevin həbs olunması ilə bağlı 24.08.2021-ci il tarixdə yaydığı rəsmi məlumata. Sözügedən məlumatda göstərilir ki, Aqil Babayev 2000-2021-ci illər ərzində dələduzluq, yəni etibardan sui-istifadə etmə və ya aldatma yolu ilə 50-yə yaxın şəxsin külli miqdarda pullarını ələ keçirib.

Maraqlıdır ötən 21 il ərzində dələduzluğa məruz qalmaları barədə bu 50 nəfərdən heç olmasa biri hüquq mühafizə orqanlarına müraciət edibmi? Özlərini zərərçəkmiş kimi göstərənlərdən 2-3-ü nə üçün bundan 10 il, 5 il, lap 1 il qabaq hüquq mühfizə orqanlarına müraciət edərək haqqlarını tələb etməyiblər? Ediblərsə niyə Aqil Babayevin barəsində vaxtında ölçü götürülməyib? Niyə Aqil Babayev evi soyulduqdan, pulları oğurlandıqdan, mal-mülkü talan olunduqdan sonra həbs edilib?

 



Paylaş: