Ötən ilin fevralın 1-də Suraxanı rayonunda əri Ehtibar Qasımov tərəfindən döyüldüksən sonra çoxsaylı bıçaq zərbələri ilə qətlə yetirilən Fəridə Qasımovanın ailəsi istintaqdan və məhkəmənin gedişatından narazıdır.

F.Qasımovanın anası Pərvin Əcəmova “Qafqazinfo”ya müraciət edərək bildirib ki, qızının qətli ilə bağlı cinayət işinin istintaqını Suraxanı rayonu prokurorluğu düzgün aparmayıb:

“Ehtibarla qızım 11 il evli olublar, iki uşaqları da var idi. Qızının 10, oğlunun da 8 yaşı var. Yanvarın 30-u yeznəm məni evlərinə çağırdı, orada Ehtibar mənə qızımın telefonla başqa bir şəxslə danışdığını dedi. Qızımın da öz şəxsi telefonu olmayıb. Ehtibar dedi ki, onun telefonu ilə başqa kişi ilə danışır. Gətirdi bir səs yazısı qoydu. Mahnının səsindən heç nə eşitmək olmurdu. Qızıma dedim “sənsən bu?”, o da and-aman elədi ki, səs ona aid deyil. Ehtibara dedim ki, gəl araşdıraq elə bir şey olsa, qızımın atası, qardaşları var, onlara da deyərik. Qızımın qayınanası dedi ki, Ehtibar bilsə, gəlib evə od vurar. Bir gün sonra, yanvarın 31-i Ehtibarın işlətdiyi mağazaya getdim. Soruşdum ki, nəsə araşdıra bildi, ya yox? Ehtibar mənə, hələ heç nə araşdırmadığını dedi".

P. Əcəmova qeyd edib ki, fevralın 1-i axşamüstü qızıgildən ona zəng edərək tez ora gəlməsini istəyiblər: "İçəri girəndə Ehtibarın yerdə uzandığını gördüm. Dedim ki, "nə olub, ay Ehtibar, kimsə vurub səni?” Sonra gördüm ki, qızımın meyitini həyətdə uzadıblar. Mən qaçıb, qışqırmaq istəyəndə Ehtibarın qardaşı ağzımı tutdu. Təcili yardıma zəng etmək istəyirdim, qoymadılar".

Mərhum F. Qasımovanın anası iddia edib ki, Ehtibar qızını əvvəlcə döyüb, sonra da 7 bıçaq zərbəsi ilə qətlə yetirib: "Meyiti yuyanda mən qızımın fotolarını çəkdim. Meyitin bir çox yeri göyərmişdi, döyülmə xəsarətləri açıq-aşkar görünürdü.

Amma Suraxanı rayon prokurorluğunda məsələni ört-basdır etdilər. Ehtibara döyülmə ilə bağlı heç bir ittiham verilmədi, bu istiqamətdə araşdırma aparılmadı. Biz nə qədər təkid etsək də, ekspertiza keçirilmədi".

P.Əcəmova bildirib ki, indi də Ağır Cinayətlər Məhkəməsində hakim qətl törədilən zaman evdə olan şəxsləri dindirmir: "Evdəki şahidlər gəlib heç ifadə vermirlər. İçəridə kimlər olmayıb onlar məhkəməyə gəlir. Qayınana, qayın arvadı məhkəməyə gəlmir, amma faktiki şahid onlardır. Ehtibar özü izahat verib ki, qızımı vuranda evdə azyaşlılardan başqa heç kim olmayıb. Tutduğu əməldən peşman olmadığını da deyib. Sonradan bu izahat dəyişildi, evdə digər insanların olduğu da qeyd edildi. Qızımın necə öldürüldüyünü hamısı görüb. Çünki hamısı bir otaqda otururdular. Məhkəmədə Ehtibara qızımı niyə o cür döydüyü sualı da verilmir. İnanın ki, mən övladımın meyitini yuyanda bir dənə də olsun, sağlam yer tapmadım. O qədər döymüşdü ki, ciyərləri partlamışdı".








Paylaş: