Bu gün Ucar rayonunda şəhid leytenant Elnur Vəliyevin anım mərasimi keçirilib. Tədbir iştirakçıları şəhidin məzarını ziyarət edib, üzərinə gül dəstələri düzüb və ruhuna dualar oxuyublar. Tədbirdə Ucar rayon rəsmiləri, şəhid ailələri, qazilər və qonaqlar iştirak ediblər. Mərasimdə iştirak edən Milli Qəhrəman general Polad Həşimovun anası Səmayə Həşimova alqışlarla qarşılanıb. 

Sonra şəhidin xatirəsinə inşa edilmiş abidə kompleksinin açılış mərasimi keçirilib.Açlış lentini şəhid anası Səmayə Həşimova, Ucar rayon icra başçısı Mənsur Məmmədov və şəhidin atası Əli Vəliyev kəsiblər.

Mərasimdə iştirak edən şəhd ailələri, qonaqlar çıxış ediblər. Şəhid Elnur Vəliyevin döyüş yoldaşları onun igidliyindən söz açıblar. 

Elnur Əli oğlu Vəliyev 14 aprel 1997-ci il tarixdə , Ucar şəhərində anadan olub.  Elnur Vəliyev 2018-ci ildən Azərbaycan Silahlı Qüvvələrinin Cəlilabad rayonunda yerləşən "N" saylı hərbi hissəsində xidmət edirdi.

Azərbaycan Ordusunun leytenantı olan Elnur Vəliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Xocavəndin azadlığı uğrunda gedən döyüşlərdə savaşıb. Elnur Vəliyev oktyabrın 27-də Xocavənd döyüşləri zamanı şəhid olub. 13 noyabr 2020-ci il tarixdə Ucar şəhərinin Şəhidlər Xiyabanında dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin t Sərəncamına əsasən Elnur Vəliyev ölümündən sonra "Vətən uğrunda" , "Xocavəndin azad olunmasına görə"  medalları və «Azərbaycan Bayrağı» ordeni ilə təltif edilib. 

Ailədə 3 bacının tək qardaşı olan Elnur Vəliyev nişanlı idi.

Allah şəhidlərimizə rəhmət eləsin.  

Fuad Hüseynov RegionXəbərləri.com