25-26 noyabr tarixlərində Beynəlxalq Miqrasiya Təşkilatının (BMqT) Azərbaycan nümayəndəliyinin və Azərbaycan Respublikasının Dövlət Miqrasiya Xidmətinin birgə təşkilatçılığı ilə “Azərbaycanda miqrasiya üzrə Regional Təlim Mərkəzinin yaradılmasına dəstək” layihəsi çərçivəsində Miqrasiya üzrə Regional Təlim Mərkəzinin (MRTM) Yol Xəritəsinin tərtib edilməsi üçün birgə tövsiyələrin hazırlanması məqsədilə regional seminar keçirdi.

Tədbirdə müxtəlif dövlət qurumları, Moldova, Belarus, Türkiyə, Ukrayna, Qırğızsan, Özbəkistan, Tacikistan, Gürcüstan, İran, Türkmənistanın miqrasiya agentlikləri, yerli və hədəf region ölkələrindən, Rusiyadan təhsil və vətəndaş cəmiyyəti qurumlarının nümayəndələri iştirak edirdi.

Giriş nitqi ilə çıxış edən BMqT -nin Azərbaycandakı nümayəndəliyinin rəhbəri cənab Vladimir Qorjiyev, BMT-nin Azərbaycandakı rezident Əlaqələndiricisi Vladanka Andreyeva və Dövlət Miqrasiya Xidmətinin rəisi cənab Vüsal Hüseynov seminar iştirakçılarını salamladılar.

Açılış nitqində Vladimir Qyorqiyev miqrasiya sahəsində təlim və təhsil prosesinə töhfə verəcək MRTM-nin region ölkələri üçün əhəmiyyətini vurğuladı: “Azərbaycan Regional Təlim Mərkəznin yerləşməsi üçün təsadüfən seçilməyib. Bu ölkə tarixi və mədəni ticarət yollarının kəsişməsində yerləşir və mühüm miqrasiya axını olan ölkələrlə əhatə olunub. Region ölkələrindən olan tərəfdaşlarımız öz ən yaxşı təcrübələrini və biliklərini bölüşməklə MRTM-dən faydalanacaq və ümumi işimizə töhfə verəcək, həmçinin miqrasiya ilə bağlı maraqlı tərəflər arasında daha dərin əməkdaşlıq quracaqlar”.

BMT-nin Azərbaycandakı rezident əlaqələndiricisi Vladanka Andreyevanın sözlərinə görə, regional təlim mərkəzinin yaradılması ölkələrə miqrasiya təcrübəsi mübadiləsinə kömək edəcək. “Miqrasiya üzrə Regional Təlim Mərkəzi bilik mərkəzinə çevriləcək və ölkələr miqrasiyanın idarə edilməsində ən yaxşı təcrübələrini bölüşə, miqrasiya üzrə ixtisaslaşmış milli tədqiqat institutlarını yarada, Miqrasiya üzrə Qlobal Sazişin baxışına uyğun milli və beynəlxalq səviyyədə biliklər arasında müvafiq çarpaz əlaqələr yarada biləcəklər”.

Dövlət Miqrasiya Xidmətinin rəisi Vüsal Hüseynov çıxışında bildirib ki, region ölkələrindən ekspertlərin toplandığı MRTM təhsil və təlim imkanlarının gücləndirilməsi üçün səmərəli platforma olacağını qeyd etməklə bu sahədə artıq işlər görüldüyünü vurğuladı:

“Azərbaycanda miqrasiya üzrə regional tədris mərkəzinin yaradılması layihəsi artıq bir ildir ki, həyata keçirilir. Layihə çərçivəsində biz artıq üç təlim keçirmişik”.

İştirakçıların MRTM-nin yol xəritəsi üçün tövsiyələr hazırlanan seminarın gündəliyi Mərkəzə həsr olunmuş giriş təqdimatını və onun gələcək baxışını, miqrasiya üzrə cari institusional imkanların və təlim ehtiyaclarının qiymətləndirilməsini, Yol Xəritəsinin məqsəd və vəzifələrini, BMqT-nin Afrika Miqrasiyanın İdarə Edilməsi üzrə Potensialın Gücləndirilməsi Mərkəzi, Əsas miqrasiya sütunları üzrə təlim potensialının inkişafı ehtiyaclarının müəyyən edilməsi kimi mövzuları əhatə edirdi.

BMqT-nin Azərbaycan nümayəndəliyi və DMX tərəfindən BMqT-nin İnkişaf Fondunun maliyyə dəstəyi ilə həyata keçirilən “Azərbaycanda miqrasiya üzrə regional təlim mərkəzinin yaradılmasına dəstək” layihəsi regionda miqrasiya sahəsində hökümətlər və maraqlı tərəflər arasında geniş məlumat mübadiləsi, araşdırma və dialoqa xidmət edəcək miqrasiya üzrə regional təlim mərkəzi vasitəsilə Azərbaycan, MDB və digər xarici ölkələrdə miqrasiya idarəçiliyi sahəsində regional təhsil potensialını və əməkdaşlığı artırmağı hədəfləryir.