Dərs ilinin ortası olmasına baxmayaraq, bir çox məktəblərdə şagirdlərin oxuduqları bölmələri dəyişmələri ilə bağlı problemlər yaşanmaqdadır. Belə ki, bu problemlər daha çox övladını rus bölməsinə yazdıran valideynlərlə məktəb arasında yaşanmaqdadır.

Rus bölməsində dərslərində uğurlu olmağı bacarmayan, dil bilgisi yetərli səviyyədə olmayan şagirdlərin valdieynləri ilin sonunu gözləmədən, övladlarını Azərbaycan bölmələrinə keçirməyə çalışırlar. Bu zaman isə ciddi porblemlər ortaya çıxır.

Sual yaranır ki, dərs ilinin ortasında bu cür problemlər yaranırsa, o zaman birinci sinifə qəbul zamanı keçirilən müsabiqələr nə üçündür? Təhsil eksperti Elşən Qafarov Bizimyol.info-nun suallarını cavablandıran zaman bildirib ki, 5-6 yaşlı uşaqların məktəbə qəbulu zamanı keçirilən müsabiqələr absurddur.

“Valideynlərin rus dilində danışıb-danışmaması uşağa təsir etmir. Həmin uşaqlar 2-3-cü siniflərdə tam olaraq, sərbəst hər şeyi öyrənir. Valideynin hüququdur ki, övladını hansı dildə, hansı bölmədə istəyirsə, orada oxutsun.

Ümumiyyətlə, 5-6 yaşlı uşaqların məktəbə qəbulu zamanı keçirilən müsabiqə isə absurddur. 5-6 yaşlı uşaqların imtahan edilməsi nə deməkdir”?

Təhsil ekspertinin sözlərinə görə, dərs ilinin ortasında şagirdlərin bölmələrinin dəyişdirilməsini doğru addım deyil.

“Burada müəyyən əks-təbliğatlar var və bir çox hallarda valideyn istəyir ki, övladı məktəbə gedən kimi dərhal hər şeyi bilsin. Düşünürəm ki, birinci sinifi bitirdikdən sonra uşağın həmin bölmə üzrə oxuya bilib-bilməməsi aydın olacaq. Bunun üçün də valideynlər tələsməsinlər”.