Rusiya elitası arasında Vladimir Putinə müxalif insanlar qrupu formalaşır və onun aradan qaldırılmasına baxılır.

Bu barədə Ukrayna Müdafiə Nazirliyinin Kəşfiyyat Baş İdarəsi məlumat yayıb.

"Zəhərlənmə, qəfil xəstəlik, bədbəxt hadisə - Rusiya elitası Putinin uzaqlaşdırılması imkanlarını nəzərdən keçirir. Rusiya biznes və siyasi elitası arasında Vladimir Putinə müxalif olan nüfuzlu şəxslərdən ibarət qrup formalaşır. Onların məqsədi Putini mümkün qədər tez hakimiyyətdən uzaqlaşdırmaq və Ukraynadakı müharibələr nəticəsində Qərblə dağılmış iqtisadi əlaqələri bərpa etməkdir”, - kəşfiyyat məlumatlarında bildirilir.

Kəşfiyyat Baş İdarəsinin məlumatına görə, Rusiyada elitanın müəyyən hissəsi Rusiya Federasiyasının Federal Əks Kəşfiyyat Xidmətinin direktoru Aleksandr Bortnikovu Putinin varisi hesab edir. O, son vaxtlar rus diktatorunun gözündən düşüb. Bortnikovun rüsvay olmasının rəsmi səbəbi Ukraynaya qarşı müharibədə ölümcül səhv proqnozlarıdır.

“Məhz Bortnikov və onun şöbəsi Ukrayna əhalisinin əhval-ruhiyyəsini və Ukrayna ordusunun qabiliyyətini təhlil etməyə cavabdeh idi. Məlumdur ki, Bortnikov və Rusiya elitasının bəzi digər nüfuzlu nümayəndələri Putini hakimiyyətdən uzaqlaşdırmaq üçün müxtəlif variantları - xüsusilə, zəhərlənmə, qəfil xəstəlik və ya qəzanı nəzərdən keçirirlər”, - mesajında deyilir.

Kəşfiyyat məlumatlarına görə, Kiyevin şimalında çeçen bölmələrinin yerləşməsi ilə bağlı son “sızmanın” da bu proseslərlə əlaqəli olması mümkündür.

Sözügedən “sızma” Rusiya tərəfdən daxil olub. FSB rəhbərliyi yəqin ki, Kadırovun təsirini də zəiflətməyə çalışır. Bu, həm də Rusiya Federasiyasının hazırkı rəhbərliyindən yan keçərək, əvvəlcədən Ukrayna hakimiyyəti ilə əməkdaşlıq qurmaq cəhdi də ola bilər.